Pas shortit të Champions Leagues, presidenti i Skënderbeut Ardian Takaj, e ka cilësuar si të kalueshëm kundërshtarin e parë të skuadrës korçare.
Skënderbeu do të përballet me kampionët e Hungarisë, Ferencvaros ndërsa Takaj në një prononcim për klubin korçar ka vlerësuar kundërshtarin por u shpreh i bindur se Skënderbeu do ta kalojë këtë fazë.
“Ferencvaros është rivali më i fortë që mund të kishim përballë por unë nuk e shoh si një ekip të pakalueshëm. Kemi nisur përgatitjet dhe sigurisht objektivi ynë është të kalojmë më tej”, u shpreh presidenti Takaj.
Kreu i klubit foli dhe për merkaton duke premtuar që ekipi do të ‘kolaudohet’ shumë shpejt.
“Ekipi ka nisur përgatitjet intensive dhe do të jemi gati për datën 12 korrik. Gjithashtu jemi duke mbyllur dhe marrëveshjen e fundit të merkatos. Prezantimet do të nisin shpejt dhe afrimet do të jenë mjaft cilësore për të përballuar dhe nivelin që kërkon ky kompeticion”, përfundoi Ardian Takaj.
