Shqiptari i dyshuar për vrasjen dhe zhdukjen e një çifti pensionistësh, i shpallur në kërkim nga autoritetet britanike është arrestuar në Luksemburg.
Sipas mediave britanike, Ali Qazimaj, 42 vjeç është gjetur në një hotel në Luksemburg dhe menjëherë është arrestuar dhe është dërguar në burg.
Duke folur në konferencën për shtyp, Shefi i dedektivëve Simon Parkes tha se pronarja e hotelit e kishte identifikuar Ali Qazimaj nga imazhet në internet.
“Nuk e di se çfarë e bëri atë të dyshonte, por gjithçka që di është se ai u identifikua dhe më pas ajo njoftoi autoritetet vendase”, tha ai.
Brenda 10 ditësh Qazimaj duhet të dërgohet në Britaninë e Madhe.
Parkes tha se kërkimet për gruan, Sylvia Stuart do të vazhdojnë edhe pse nuk presin që ta gjejnë të gjallë.
Trupi i pajetë i 75-vjeçarit Peter Stuart u gjet më 3 qershor pak metra larg shtëpisë së tij, në kontenë Sufolk të Anglisë i vrarë me thikë, ndërsa gruaja, 69 vjeçe nuk është gjetur ende.
