Policia e Lezhës zbardh ngjarjen e ndodhur pasditen e sotme në Shëngjin ku mbetën të plagosur 2 persona.
Sipas të dhënave zyrtare, është arrestuar 38-vjeçari Gertjan Malshi, i cili sipas policisë ka qëlluar me një armë gjahu shotgan drejt familjes Aliaj duke plagosur gruan Mimoza Aliaj, 49 vjeçe. Po kështu është plagosur edhe vetë autori si dhe 2 persona të tjerë me mjete të forta. Policia nuk jep detaje për motivet e ngjarjes por mjaftohet me deklaratën se ka ndodhur për motive të dobëta.
DEKLARATA E POLICISË
Zbardhet ngjarja e ndodhur me datë 17.06.2016 ndodhur nën 14:30 në Shëngjin ku mbetën të plagosur 2 shtetas.
Arrestohet në flagrancë autori i dyshuar.
Sekuestrohen 1 armë gjahu “Shotgan”, 19 fishekë dhe mjete të forta të përdorura në konflikt
Me datë 17.06.2016, nga Sektori i Krimeve të Rënda, u bë arrestimi në flagrancë i shtetasit :
Gertjan Malshi, 38 vjeç, banues në Pllanë.
Ky shtetas dyshohet se ka konsumuar veprën penale “Vrasje në rrethana të tjera cilësuese” mbetur në tentative, parashikuar nga neni 79/dh-22 të Kodit Penal.
Me datë 17.06.2016 rreth orës 14 :30, është njoftuar se në vendin e quajtur “Rruga e Kunes” në Qytetin e Shëngjinit, ka ndodhur një plagosje me armë.
Menjëherë në vendngjarje kanë mbërritur forcat policore që falë ndërhyrjes së shpejtë kanë bërë të mundur parandalimin e përshkallëzimit të situatës deri në vrasje, duke kapur dhe shoqëruar palët në konflikt si dhe sekuestruar armën dhe mjetet e përdorura.
Nga veprimet hetimore është konstatuar se shtetasi Gertjan Malshi, pas një konflikti me shtetasin G.A. 52 vjeç, shtetasen M.A. 49 vjeçe , dhe shtetasin K.A. 18 vjeç, banues të gjithë në Mal- Shëngjin (pjesëtarë të një familje) ka qëlluar me armë gjahu në drejtim të tyre.
Për pasojë ka mbetur e plagosur shtetasja M.A. cila pas dhënies ndihmës së parë mjekësore është dërguar për ndihmë më të specializuar në spitalin e Traumës në Tiranë.
Po kështu të plagosur në konflikt e sipër me mjete të forta kanë mbetur shtetasi G.A., shtetasi K.A. si dhe autori i dyshuar Gertjan Malshi të cilët pas ndihmës mjekësore në spitalin e Lezhës ndodhen jashtë rrezikut për jetën.
Gjatë këqyrjes së vendit të ngjarjes janë gjetur dhe sekuestruar në cilësinë provës materiale :
– Një armë gjahu e tipit “Shotgan”
– Automjeti në pronësi të shtetasit Gertjan Malshi
– 19 fishekë arme gjahu
– sende të forta
Nga veprimet e para hetimore të kryera ka rezultuar se palët janë konfliktuar për motive të dobëta.
Gjithashtu do të referohen materialet në Prokurorinë e Rrethit Gjyqësor Lezhë edhe në ngarkim të shtetasit G. A. për kryerjen e veprës penale “Plagosje e lehtë me dashje”, parashikuar nga neni 89 i Kodit Penal.
