Lufta e së ardhmes fillon sot. Spiunazhi, jo si ai i filmave të James Bondit, por i dronëve dhe satelitëve spiunë, është rikthyer për të luajtur një rol kyç në strategjitë ushtarake dhe politike të fuqive botërore. Edhe sistemet e mbrojtjes kundër spiunëve-robotë janë gjithnjë e më të rëndësishme në konfliktet e shekullit 21.
Pikërisht sot, Ministria e Mbrojtjes e Rusisë ka deklaruar se ka porositur kontenierë “futuristë”, të përshtatur për të mbrojtur sistemet raketore, radarët, pikat e dobëta të komandës dhe pajisjet e tjera elektronike ushtarake, nga identifikimi dhe lokalizimi i tyre prej dronëve, avionëve të zbulimit dhe satelitëve spiunë të qeverive të tjera. Këta sisteme spiunazhi, përveçse përdorin telekamera me rreze infra të kuqe dhe radarë ushtarakë, përdorin një sistem studimi të rrezatimeve elektromagnetike në gjendje të identifikojë dhe lokalizojë pajisjet elektronike ushtarake, për qëllime strategjike dhe të zbulimit. Pra, mbrojtja e sistemeve të veta komplekse elektronike, nga qeveritë armike, merr një rëndësi jetike, mbi të gjitha për Rusinë, që siç nënvizon burimi i Ministrisë së Mbrojtjes, i druhet satelitëve spiunë të SHBA, në kontekstin e zhvillimit të sistemeve të luftës elektronike.
“Këtë vit kemi në program që të marrim kontenierë për sistemet më të fundit tokë-ajër dhe antiraketorë, mes të cilëve dhe ata S-500”, deklaron e përditshmja Izvestia, që citon burimin e brendshëm të Ministrisë. Sistemet S400 dhe S500 janë ndër sistemet më të përparuar të mbrojtjes antiajrore në planet. Projektuar nga ushtria ruse, në përgjigje të Pgs (Prompt Global Strike) të amerikanëve, një sistem aeronautik në gjendje të godasë me saktësi absolute me armë konvncionale cilëndo pikë të globit brenda më pak se një ore. Siç deklaron e përditshmja Analziae Mbrojtjes: “Që prej vitit 2014, doktrina e re ushtarake e miratuar nga Moska përcakton konceptin e Pgs dhe sistemet ushtarake të NATO-s që janë vendosur përgjatë kufijve të Rusisë, si një prej rreziqeve parësore ushtarake për sigurinë e vendit”.
Sistemet kundërajrorë rusë do të përdoren kryesisht për mbrojtjen e zonave me rëndësi strategjike për qeverinë e Vladimir Putinit. Janë instrumenta tejet efikasë dhe të lëvizshëm, një bateri e vetme e S400 apo S500 mund të sulmojë më shumë se një dyzinë objektivash në mënyrë të njëkohshme. Moska pohon se “S400 mund të shpërbëjë bombarduesit strategjikë B-52, B-1 dhe F-111, ashtu sikurse edhe EF-11A Raven, EA-6 Prouler dhe avionin spiun U-2. Një pre e lehtë për S400 do të ishin edhe E3 Sentry si dhe E-2haukeye. Në listën e gjuajtësve perëndimorë që rusët pohojnë se janë në gjendje t’i rrëzojnë, figurojnë edhe F-15 dhe F-16”, me fjalë të tjera, një pjesë e madhe e flotave aeronautike të qeverive perëndimore konsiderohen objektiva për t’u rrëzuar, nga ana e sistemeve të reja kundërajrore ruse. Siç shkruan “Mbrojtja Online”, “çdo platformë ajrore e Perëndimit nuk do i shpëtonte dot sistemeve S400”.
Sistemi S500, ndoshta më i rëndësishëm se sa S400, është një sistem i studiuar për të interceptuar dhe shkatërruar raketat balistike interkontinentale, raketat dhe avionët supersonikë dhe të ashtuquajturit AVACS, ose më saktë kufirin e ri të spiunazhit ajror të qeverive perëndimore. S500 është në gjendje të pikasë, sulmojë dhe shkatërrojë deri në 10 objektiva supersonikë në mënyrë të njëkohshme, në gjendje të arrijë shpejtësi deri 25 mijë kilometra në orë.
Sistemet e reja kundërajrore ruse, modernizimi i tankut të famshëm T-72 dhe inspektimet e shumta surprizë të presidentit rus, në cilësinë e tij si komandant i përgjithshëm i forcave të armatosura, për të testuar “gatishmërinë e luftimit” të reparteve të ndryshme ushtarake, janë vetëm disa prej risive që ushtria ruse po vë në zbatim, me qëllimin që të mbetet në ritëm me SHBA.
Rëndësia dhe aftësia për të mbrojtur dhe fshehur teknologjitë ushtarake të këtij kalibri është e qartë se është një pikë kyçe në konfliktet moderne, sidomos për një vend si Rusia. Zhvillimi teknologjik dhe progresi i elektronikës ushtarake do të vazhdojnë të luajnë një rol gjithnjë e më të rëndësishëm në luftërat e sotme dhe ato që do të vijnë. /Il Giornale – Në shqip nga www.bota.al
