Argjentina e ka mbyllur me pikë të plota Grupin D të Kupës së Amerikës duke mundur 3-0 Bolivinë. Kili ka dalë në vendin e dytë falë fitores 4-2 kundër Panamasë.
Lamela, Lavezzi dhe Cuesta kanë qenë autorët e golave për “Seleccion”. Skuadra e Tata Martino-s do të përballet në çerekfinale me ekipin e Venezuelës. Për sa i takon ndeshjes tjetër të këtij grupi, Kili ka siguruar vendin e dytë dhe kualifikimin falë dy dygolëshave të realizuar nga Edu Vargas dhe Alexis Sanchez. “La Roja” do të luajë në çerekfinale kundër Meksikës.
Ka qenë gjithçka e lehtë për Argjetninën, që ka gjetur golin e avantazh pas vetëm 13 minutash lojë me një goditje dënimi të Lamela-s, të devijuar nga muri. Dyfishimi ka ardhur në minutën e 15-të me “Pocho” Lavezzi-n, i cili ka devijuar topin në portë pas një goditje me kokë të Higuain që është pritur nga Lampe. Victor Cuesta ka mbyllur llogaritë në minutën e 32-të të pjesës së parë duke realizuar gol në debutimin e tij në një ndeshje zyrtare me Argjentinën.
Takimi i dytë i këtij grupi, i zhvilluar në “Lincoln Financial Fild” të Philadelphia-s, ka nisur në mënyrën më të keqe për Kilin, që ka pësuar gol pas 5 minutash lojë. Edu Vargas ka barazuar në minutën e 15-të dhe ka përmbysur gjithçka në të 43-ën. Në minutën e 50-të Alexis Sanchez ka çuar shifrat në 3-1 para se Arroyo të ngushtonte diferencat për Panamanë. Në minutën e 89-të ka qenë sulmuesi i Arsenal që ka fiksuar shifrat në 4-2.
