Trajneri i kombëtares franceze Didier Deschamps ka bërë një analizë të shkurtër për kundërshtarin e radhës, Shqipërinë duke thënë se do kenë një kundërshtar të fortë.
Në një intervistë për emisionin francez Telefoo,Didier Deschamps tha se ekipi kuqezi është i organizuar mjaft mirë si skuadër.
“Shqipëria është kundërshtar i vështirë. Treguan se kanë skuadër të mirë, dhe arritën të përballen denjësisht me Zvicrën edhe me 10 lojtarë. Trajneri italian De Biasi i ka organizuar mirë si skuadër. Prandaj mendoj se ndeshja e të mërkurës në Marsejë nuk do të jetë aspak e lehtë,” tha ai.
Pas trajnerit, ishte dhe sulmuesi kryesor i bluve, Antoni Griezmann, që premtoi se do të përpiqej të kthehej në formën e tij më të mirë në përballjen me Shqipërinë, pas një sezoni të lodhshëm me Atletikon.
Shqipëria dhe Franca do të përballen të mërkurën në orën 21:00 në “Velodrome”. Shqipëria ka marrë dy rezultate pozitive në dy miqësoret e zhvilluara me Francën në eliminatore, një fitore dhe një barazim.
