Kapiteni i Anglisë Wayne Rooney dhe trajneri Roy Hodgson i kanë bërë thirrje tifozëve që të mos krijojnë më rrëmuja në pritje të përballjes delikate me Uellsin, që “Tre Luanët” do të zhvillojnë të enjten e ardhshme në Euro 2016. Skenat e dhunës të verifikuara në Marsejë gjatë fundjavës, ku janë përfshirë huliganë të Anglisë dhe Rusisë, kanë shtyrë UEFA-n t’i paralajmërojë të dy kombëtaret se mund të përjashtohen nga kompeticioni nëse kjo situatë do të vazhdojë. Ky paralajmërim ka shtyrë Rooney dhe Hodgson që t’i bëjnë thirrje mbështetësve të tyre.
Federata Angleze shpreson që ky gjest të ndërgjegjësojë tifozët dhe të parandalojë përleshje të tjera, që mund të zhvillohen në Lens para sfidës vendimtare me Uellsin. Rooney i ka kërkuar tifozëve që nuk kanë biletë që të mos udhëtojnë drejt Francës. “Dua të falënderoj tifozët e Anglisë për mbështetjen e madhe që na kanë dhënë brenda stadiumit në ndeshjen kundër Rusisë dhe tani na pret një ndeshje e rëndësishme kundër Uellsit”, ka thënë Rooney.
“I bëj thirrje tifozëve që nuk kanë një biletë që të mos vijnë këtu. Ata që kanë një biletë duhet të jenë të ndërgjegjshëm dhe të vazhdojnë të mbështesin ekipin. Faleminderit”. Trajneri Hodgson ka pranuar se është i shqetësuar për mundësinë e përjashtimit për arsye që nuk janë në dorë të ekipit. “Si trajner i Anglisë jam shumë i shqetësuar për këtë kërcënim që na është bërë dhe për masat që mund të merren kundër ekipit tonë”, ka thënë Hodgson. “Kemi punuar shumë për të ardhur deri këtu dhe duam të vazhdojmë rrugën tonë në këtë kompeticion. I bëj një apel të gjithë tifozëve tanë që të qëndrojnë larg telasheve dhe të vazhdojnë të mbështesin ekipin në mënyrë të përgjegjshme”. Nëse rastet e dhunës së parë në Marsejë do të përsëriten Anglia rrezikon seriozisht qëndrimin në Europian.
