Brazilit i duhej vetëm një barazim kundër Perusë për të siguruar kualifikimin në 1/8 e finales në Copa America.
Por, 15 minuta para përfundimit të takimit një krosim nga Andy Polo shkoi në drejtim të Raul Ruidiaz, i cili me dorë e dërgon topin në rrjetën e Brazilit, por një gjë e tillë nuk ndalohet nga gjyqtari i ndeshjes, duke u pranuar kështu goli që eliminoi Brazilin nga kjo garë, raporton Koha.net.
Pas shënimit të golit, futbollistët e Brazilit e rrethuan gjyqtarin Andres Cunha për të ndryshuar mendimin, duke bërë presion mbi të, por ishte e kotë, pasi goli nuk u anulua.
Dunga u shpreh se me këtë rast nuk kanë çka të bëjnë, pasi një gjë e tillë nuk mund të ndryshohet.
“Çdokush e ka parë se çfarë ndodhi sot. S’mundemi të bëjmë asgjë”, ka thënë Dunga, raporton Express.co.uk.
Humbja nga Peru e dërgon Brazilin në shtëpi, duke mos arritur kështu të kalojë grupet për herë të parë që nga viti 1987. Grupin B e kalojnë Peru, si lider, dhe Ecuadori. Të premten Peru luan kundër Kolumbisë.
