Sasha Huet-Baranov 28 vjeç është një agjent futbolli nga Rusia dhe ka lidhje të forta me disa klube Shqipëri, Bullgari, Rusi, Serbi, Poloni, Ukrainë dhe Kazakistan. Në një intervistë për mediat franceze, ai flet për Shqipërinë në EURO 2016 dhe ekipet shqiptare.
“Është një evolucion i madh në futbollin shqiptar ajo që po ndodh me ekipin kombëtar. Sa i përket klubeve, ne pamë Skënderbeun të kualifikohet në Europa League. Është një evoluciuon, që sigurisht ka ende shumë punë për të bërë. Gjatë tre viteve të fundit, veçanërisht që nga ardhja e De Biasit, është bërë shumë punë. Gjithashtu shikojmë edhe rolin e Lorik Canës. Ai është një ambasador i futbollit shqiptar”, thotë agjenti i futbollit.
Sa i përket mundësisë që shqiptarë të Kosovës mund të mos luajnë për Shqipërinë tani që Kosova u anëtarësua në FIFA dhe UEFA, ai thotë se ekziston si mundësi, megjithatë ai shton se kjo mbetet përzgjedhje e gjithësecilit për kë do të preferojnë që të luajnë.
I pyetur për ekipet shqiptare, Baranov thotë se Skënderbeu ka mundësi për më mirë.
“Ky popull ka një dëshirë të madhe për të ecur përpara. Ne nuk duhet të harrojmë se Shqipëria nuk është më një vend i mbyllur”, shpreh 28-vjeçari rus.
