Nga Lulzim Omuri
Këtë vit u perkujtua 138-vjetori i “Lidhjes se Prizrenit” në Kosovë. U zhvillua takim mes forumeve rinore mbarë shqiptare. Gjithashtu në të njetën ditë u festua edhe 4-vjetori i memorandumit te bashkërendimit të qëndrimeve mes forumeve. Hapsirat e bashkëpunimit rajonal dhe atyre të trojeve Shqiptare ishin temat kryesore.Evidentimi dhe njohja e se shkuarës si një gur themeli për të ardhmen e përbashkët ne BE.
“Lidhja Shqiptare për mbrojtjen e të Drejtave të Kombësisë Shqiptare”, ose “Lidhja e Prizrenit, ose “Lidhja Shqiptare” filloi zyrtarisht me tubimin e 300 delegatëve të të gjitha krahinave shqiptare e mbajtur në Prizren më 10 qershor 1878. Të gjithë të bashkuar me qëllim formimin e një shteti autonom shqiptar që do të mbulonte vilajetet osmane të Kosovës, Shkodrës, Manastirit dhe Janinës.
Sot e gjithmonë, ne duhet ta kremtojmë të gjithë së bashku, Shqipëri, Kosovë, shqiptar të Maqëdonisë, Malit të Zi, Lugina e Preshevës e mbarë kombasit shqiptar kudo ndodhen, këtë ngjarje nga më madhoret e historisë kombëtare, këtë Lidhje Shqiptare si lëvizjen e parë të mire organizuar politikisht, administrativisht dhe ushtarakisht.
Viti 1878 shënoi agimin e Rilindjes Kombëtare të Shqipërisë. Lidhja Shqiptare ishte organizata e parë patriotike kombëtare. Ishte shprehja e parë konkrete e vendosmërisë mbarëkombëtare për arritjen e pavarësisë shqiptare pas dy mijë vjetësh sundimi i huaj.
Në Prizren, për herë të parë, një përfaqësi e prijësve shqiptarë, myslimanë e të krishterë, nga veriu e nga jugu, u bashkuan me vepra konkrete që të kundërshtonin aneksimin e tokave shqiptare nga shtetet fqinje lakmitare. Në sikron me këtë trashëgimi gjenë jehonë mesazhi dhe qëndrimi i Kryetarit të PDSH Z. Lulzim Basha i cili shprehet: “Patriotizmi nuk shprehet vetëm me fjalë, madje kur shprehet vetëm me fjalë të çon në drejtimin e gabuar, veprat janë ato që flasin”.
Pikërisht vepra e vyer e atyre patriotëve të shquar flet edhe sot pas 138 vitesh. Dhe veprat tona duhet të jenë të atilla që të kremtohen krahas kësaj në brezat e ardhshëm.
Deklarata e Lidhjes së Prizrenit përkon me botimin e një studiuesi britanik, Artur Xhon Evans, i cili botoi Letrat Ilire më 1878, ai i mbyll përshtypjet e tij për tiparet e shqiptarëve me këto fjali: “Këta janë me të vërtet bashkëpatriotët e Skënderbeut dhe të Aliut të Tepelenës trashëgimtarë të fort si shkëmbi…Shqiptari është nga natyra i shpejtë, energjik, skeptik, gjithnjë në lëvizje dhe nuk e duron mbikëqyrjen. Për të, mbi gjithçka tjetër është liria”
Në këtë pervjetor nderojmë me mirënjohje të thellë ata patriotë të shquar si: Ymer Prizreni,Iljaz Pashë Dibra Abdyl Frashërin, Konstandin Kristoforidhin, Pashko Vasën e të gjithë me radhë pa përjashtim. Jo vetëm të nderojmë veprën e tyre por edhe ta çojmë përpara. Ne mund të themi se shqiptarët sot janë më të lirë dhe më të pavarur se kurrë pas Pavarësisë së Kosovës dhe lëvizjes së lirë në Europë.
Ne konsiderojmë se kjo është një nga festat tona të rralla, përmasat e së cilës përtheksojnë gjithë shqiptarinë në Ballkan, prandaj nga të gjithë e sidomos nga institucionet tona duhet të trajtohet si ditë që integron shqiptarët, si ditë që freskon dhe begaton memorien e tyre kolektive, si ditë që parandalon aktivisht dhe pandalshëm politikat dezintegruese dhe antishqiptare. Me shpresën se duke qenë vetja dhe duke qenë më të integruar ndër veti, do të jemi më të gatshëm për integrime kualitative dhe të barabarta edhe me të tjerët.
Me dëshirën e thellë që kjo ditë do të ngrihet atje ku e ka vendin dhe prej ku shqiptarët do të njësohen pandalshëm.
Zoti bekoft mbarë popullin shqiptarë kudo ndodhet!
