Kreu i Grupit Parlamentar të LSI-së, Petrit Vasili ka deklaruar se 20 votat e LSI do të shkojnë pro reformës në drejtësi.
Lëvizja Socialiste për Integrim po mban të njëjtin qëndrim me Partinë Socialiste sa i përket reformës në drejtësi dhe vendeve të rezervuara, për të cilat këmbëngul Partia Demokratike.
Ai foli për mediat gjatë Konventës së LRI-së ku tha se LSI ka një përgjegjësi politike për të votuar reformën dhe këtë përgjegjësi do ta zhvillojë deri në fund.
Në lidhje me debatin e fundit për futjen në kalendarin trejavor të punimeve të Kuvendit të reformës në drejtësi, Vasili e quajti atë një lapsus procedurial që po fryhet nga opozita.
“Kuvendi do të sqarojë çdo keqkuptim në planin e kalendarit dhe do ta bëjë këtë. Do të sqarohet gjithçka që nuk ka të bëjë me futjen e reformës. Ka qenë një lapsus sa i takon karikimit të dokumentave dhe jo votim të reformës në sallë. Megjithatë ne duhet të jemi të përqendruar që të votojmë reformën në drejtësi”, tha ai.
