RROGOZHINE –Ishte prej 9 vitesh në kërkim ndërkombëtar për vrasje, arrestohet në Rrogozhinë 31-vjecari Florenc Shamo. 31-vjecari është dënuar me 14 vite burg për vrasjen e Ervis Dacit në 6 gusht të vitit 2007 në Itali, e tashmë mësohet se do të ekstradohet drejt këtij shteti.
Shamo u arrestua në 16 janar të vitit 2009 në Halikafs të Kanadasë, pasi ishte në kërkim prej 2 vitesh, por shteti kanadez refuzoi të kryente ekstradimin drejt Shqipërisë apo Italisë, pasi shqiptari kërkoi azil.
Në momentin e arrestimit Shamo ishte transformuar fizikisht, pasi kishte kryer operacione plastike në Greqi, si dhe kishte siguruar një kartë identiteti të falsifikuar, me emrin Vincenco Xheracitano.
Edhe pse ishte në dijeni se kërkohej nga INTERPOLI, shqiptari kishte udhëtuar në disa shtete, si Holandë, Shqipëri, Spanjë e Greqi. Ai është akuzuar se ka qenë pjesë e një bande shqiptare, që vrau Ervis Dacin, në gusht te vitit 2007, ne Firenze, pas prishjes së pazareve për prostitucionin. Nuk dihet se në çfarë rrethanash është liruar nga autoritetet kanadeze, por tashmë u arrestua në Shqipëri e do t’i dorëzohet drejtësisë italiane.
