Falë një investigimi të së përditshmes britanike “Daily Mail”, 53¬vjeçari shqiptar, Avni Metra, është vënë në pranga nga policia britanike dhe pritet ekstradimi në Shqipëri ku është akuzuar me 25 vite burg për dy vrasje në Burrel në vitin 1997.
I cilësuar si gangsteri që iu fsheh policisë aq mirë, Avniu do të lëvizë gjithë gurët ligjorë për t’i shpëtuar ekstradimit në Shqipëri.
Në seancën gjyqësore në ngarkim të tij, ai është shfaqur i vendosur për të mos u kthyer kurrë në Shqipëri.
“Kur ai u pyet nëse do të kthehej vullnetarisht në Shqipëri, ku i duhet të vuajë dënimin, Metra pështuy dhe u përgjigj “Kurrë!”¬ shkruan Daily Mail. Nenet që do e “shpëtojnë” Ai ka kundërshtuar ekstradimin duke përdorur si mbrojtje dy nenet e përcaktuara në Konventën Europiane të të Drejtave të Njeriut. Neni i parë është neni 8, i cili mbron të drejtën familjare. Avokatja e tij është shprehur se nëse ai do të ekstradohet atëherë do të shkelet ky nen, pasi ai prej vitesh është i vendosur në Britani dhe ka një ‘lidhje të fortë’ me katër fëmijët e tij dhe partneren e mëparshme. Ndërsa neni i dytë është neni 10, i cili ka të bëjë me lirinë e shprehjes. Bazuar në këtë nen, avokatja i ka kujtuar gjykatës se Shqipëria ka kaluar në një periudhë të vështirë në vitin 1997, vit ky në të cilin dyshohet se Metra ka kryer dy vrasjet, dhe se gjithashtu ai është larguar nga Shqipëria me status të caktuar politik.
Zbulimi dhe arrestimi
Gazetarët e kanë gjurmuar 53¬vjeçarin në një apartament në Borehamëood, Hertfordshire, ku ai jetonte prej vitesh.
“Dora e tij e djathtë, vendoset në mënyrë mekanike pranë dy thikave”, e nis shkrimin “DailyMail” teksa tregon përballjen me të akuzuarin për vrasje të dyfishtë. Ai kishte jetuar qetësisht në Britaninë e Madhe për 18 vjet, e më në fund është kapur pas një hetimi të “Daily Mail”. Kërkimi ndërkombëtar kishte dështuar për të gjetur shqiptarin Metra, i cili kishte paguar një trafikant £ 5.000 për të ikur në Britani të Madhe, pasi u dënua me 25 vjet burg në Shqipëri për dy vrasje të tmerrshme. Pavarësisht se renditej në listën e më të kërkuarve nga Interpoli dhe ishte arrestuar në Londër për dhunë ndaj bashkëshortes, ai nuk ishte arritur të identifikohej se ishte shqiptari i kërkuar për dy vrasje sepse ishte maskuar në Britani si refugjat kosovar. Metra kishte siguruar një pasaporte britanike pas mbërritjes në vend në vitin 1998, me pretendimin se ishte refugjat kosovar.
Por kush është Avni Metra?
Ai akuzohet për dy vrasje në Shqipëri në vitin 1997 në qytetin e Burrelit. Metra ka qëlluar për vdekje një person me mitraloz në vitin 1997 dhe, vetëm tre muaj më vonë, ai ishte pjesë e një bande që dhunuan një tjetër person, i prenë veshët, i nxorën sytë dhe pastaj e qëlluan për ta lënë të vdekur.
Avni Metra bashkë me një bashkëpunëtor, kanë goditur për vdekje një roje sigurie të quajtur Kadri Xhetani, i cili ka ndaluar dy bashkëpunëtorët, të cilët po vidhnin një fabrikë mielli. Ata i kanë bërë pritë edhe vëllait të Kardi Xhetanit, menjëherë pas funeralit të vëllait dhe duke e sulmuar e kanë hedhur në një pyll pranë lumit. Kjo ka sjellë konfliktin e madh mes dy bandave të cilët kërkonin hakmarrje ndaj njëri¬tjetrit. Motra e Kadri dhe Nevruz Xhetanit, e cila e ka identifikuar fytyrën e Avni Metrës ka thënë se Metra dhe shoku i tij i bandës e kanë prerë vëllanë e tij pjesë¬ pjesë ndërkohë që ai ishte gjallë, duke i hequr sytë dhe veshët. Në vitin 1998, autoritetet e qytetit të Burrelit nisën hetimet për vrasjet masive dhe kjo solli arratisjen e anëtarëve të bandës, ndër to edhe Avni Metra. Pas një hetimi të gjatë, gazeta britanike ka zbuluar se Avni Metra, në vitin 1998 kishte hyrë në Britani, duke u hequr si një refugjat i luftës së Kosovës dhe se jetonte në këtë vend nën identitetin e Advul Mekra. Qeveria i dha Metras një shtëpi në veri të Londrës në vitin 1999 me gruan dhe fëmijën, të cilët ishin paraqitur gjithashtu si refugjatë kosovarë. Në vitin 2010, ai u arrestua dhe më vonë u akuzuar për dhunë në familje e kaloi disa javë në paraburgim. Detektivët nuk e kishin kuptuar se Metra, duke përdorur emrin fals Avdul Mekra, ishte në fakt një i arratisur famëkeq. Babai i katër fëmijëve do të dalë në gjykatë për t’u përballur me procedurat e ekstradimit.
