Deputetja e PD-së, Jozefina Topalli gjatë mbledhjes së djeshme u tregoi deputetëve të PD një bisedë të bërë me ambasadorin gjerman, Helmut Hoffman si shembull se si e kanë perceptuar të huajt ligjin për dekriminalizimin.
Topallit, ambasadori i kishte thënë se opozita këmbënguli për të bërë një ligj për të hequr ministrin Blendi Klosi, për dy birra që ai kishte konsumuar në të kaluarën.
“Dua të tregoj një rast në lidhje me këtë mënyrën se si diplomatët i perceptojën gjërat dhe më pas ua përcjellin vendeve të tyre respective. Më ka ndodhur në një takim me përfaqësuesit e Bundestagut, ku ambasadori Hoffman më ka thënë: Ju e bëtë ligjin për dekriminalizimin që të hiqni Blendi Klosin se ka pirë dy birra. U gjenda e befasuar nga ai qëndrim, sepse nuk është puna vetëm te ambasadorët vendas, është problemi te dokumentet dhe komunikimi që ata kanë me vendet e tyre, pasi përfaqësuesit e tyre andej kanë si referim vetëm informacionet që marrin nga përfaqësuesit e tyre”, është shprehur Topalli, sipas gazetës Panorma. Ky shembull i Topallit ishte në mesin e debatit në grupin parlamentar të PD për amabsadoren Vlahutin, e cila është vënë nën akuzë nga opozita se është pozicionuar politikisht pranë qeverisë. Me rrëfimin e saj Topalli kërkoi që PD të vendosë komunikim të drejtpërdrejtë me përfaqësuesit e BE për të mos i lënë çështjet e rëndësishme që t’u përcillen me keqkuptime nga të dërguarit e tyre në vendin tonë. /Lapsi.al
