Policia e Vlorës ka arrestuar 4 persona të dyshuar si pronarë të 9 parcelave me 14.205 rrënjë bimë narkotike në 6 fshatra të Vlorës. Bimët u zbuluan dhe u asgjësuan.
Policia dje ka djegur mbi 14 mijë rrënjë. Sipas saj, në fshatin Kuç – Vlorë, është gjetur dhe asgjësuar 1 parcelë me 1200 rrënjë bimë narkotike, me lartësi deri në 40 cm dhe u arrestuan 2 kultivuesit e këtyre bimëve narkotike: Qemal Baraj, 50 vjeç, banues në fshatin Llakatund – Vlorë dhe Virion Baraj, 33 vjeç, banues në fshatin Bishan – Vlorë.
Në fshatin Mekat – Vlorë, është gjetur dhe asgjësuar 1 parcelë me 800 rrënjë bimë narkotike, me lartësi deri në 45 cm dhe u arrestuan: Orges Feta, 25 vjeç, banues në fshatin Shushicë – Vlorë dhe Anastas Bregaj, 38 vjeç, banues në fshatin Llakatund – Vlorë.
Gjithashtu, Policia ka zbuluar dhe asgjësuar edhe 7 parcela të tjera me 12.205 rrënjë bimë narkotike, të mbjella në 4 fshatra të Vlorës (Armën-Vlorë, Dushkarak-Vlorë, Dhrovjan-Sarandë dhe Vergo-Delvinë), me lartësi qe varionin deri në 100 cm. Policia ka bërë asgjësimin e bimëve narkotike me djegie.
