Projektligji “Për shpalljen e moratoriumit të gjuetisë në Republikën e Shqipërisë” u miratua më 75 vota gjatë seancës së sotme parlamentare, fill pas përfundimit të moratoriumit 2-vjeçar.
Moratoriumi i gjuetisë hyn në fuqi 15 ditë pas botimit në Fletoren Zyrtare, por pavarësisht kësaj, Shqipëria atualisht është në sezonin e ndalimit të gjuetisë prej 16 Shkurtit 2016 (16 Shkurt – 30 Shtator, sezoni i ndalimit të gjuetisë).
Ky moratorium ndryshe nga ai 2-vjeçar, ka parashikuar dhe rastet e përjashtimeve për arsye të një afati kohor më të gjatë, njofton Ministria e Mjedisit.
Përjashtimet në fushat e veprimit janë: Gjuetia në rastet e konstatimit të mbipopullimit të një lloji të faunës së egër, në zonat e lejuara për gjueti dhe në rezervatet e mbarështimit sipas legjislacionit në fuqi për gjuetinë; Gjuetia për qëllime kërkimore-shkencore. Këto raste propozohen nga Ministri i Mjedisit dhe miratohen me vendim të Keshillit të Ministrave.
