Partia Socialiste do të depozitojë në Prokurorinë e Përgjithshme një kërkesë për fillimin e verifikimit të te dhënave të deklaruara nga deputeti demokrat Flamur Noka, në formularin e vetedeklarimit. Po kështu nënkryetari i grupit të PS, Taulant Balla ka përshëndetur dorëheqjen e kryebashkiakut të Kavajës, Elvis Rroshi duke thënë se këtë shembull duhet ta ndjekë edhe Berisha.
“Prokuroria të nisë sa më shpejt hetimin dhe verikifimin e formularit të vetëdeklarimit të deputetit Noka, i cili nuk ka deklaruar të dhëna të rëndësishme që lidhen me ndalimin e tij dhe vendosjen e masës së sigurisë, duke u dëbuar nga një shtet i huaj, në fillim të viteve ’90-të”, tha nënkryetari i grupit të PS-së, Taulant Balla në një prononcim për mediat jashtë sallës së parlamentit, ku po zhvillohet seanca plenare.
Kjo, sqaroi Balla, është një procedurë që ne do ta ndjekim edhe për disa raste të tjera të deputetëve apo përfaqësuesve të qeverisjes vendore të PD-së, për të cilët kemi informacione shumë të nevojshëm për të kaluarën e tyre.
Ai gjithashtu përmendi edhe vetëdeklarimin e ish-kryeministrit Sali Berisha, i cili sipas tij duhet të ndjekë shembullin e Rroshit, pasi ka dhënë informacione të pasakta për gjeneralitetet.
“I bëj thirrje PD-së që vetë të jetë pjesëmarrëse në këtë proces pasi edhe në frymën e ligjit që kemi miratuar me konsensus. Rasti më flagrant, është rasti i deputetit Sali Ram Berisha i cili në formularin e vetëdeklarimit ka fshehur një gjeneralitet të përdorur në pjesën më të madhe të jetës së tij, bëhet fjalë për datëlindjen që e ka mbajtur deri në 2009, 1 korrik 1944 ndërkohë që pas këtij viti mban një tjetër datë”, nënvizoi Balla.
“Rasti i dorëheqjes së kreut të Bashkisë së Kavajës është për t’u përshëndetur, dhe duhet të ndiqet nga çdo person tjetër që në formularin e vetë të deklarimit ka dhënë të dhëna të pasakta. Siç është rasti i Berishës së ka shkelur pikën dy. Duhet të thuhen të gjitha gjeneralitetet, emër, mbiemër, vendlindje, ditëlindje. Dhe sidomos kur këto janë ndryshuar. Mund të ketë njerëz me emër e mbiemër të njëjtë, dhe i diferencon dita e lindjes për shembull. Pas tre muajsh do të jem sërish para jush për të folur për përgjigjen që do të kem marrë nga prokuroria”, shtoi Balla.
.
