Luan Koprencka, 55 vjeçari u godit për vdekje me thikë nga shtetasi Alban Hyka ditën e djeshme në rrugën “Llambi Bonata” në Tiranë.
Shkak i sherreve të vazhdueshme me pronarët e lokalit poshtë shtëpisë së tij ka qenë tavani që i pikonte në lokal pronarëve dhe që 55 vjeçari refuzoi ta riparonte. Përveç kësaj zhurma në lokal gjatë orëve të natës ishin bërë shkak për grindje mes tij dhe pronarëve të lokalit.
Një ditë më parë ai ishte duke kaluar përballë lokalit kur ka nisur të grindet përsëri me dy persona, Alban Hykën dhe kunatin e këtij të fundit, Vladimir Ismailin. Sherri mes tyre ka nisur për shkak se nga tualeti i apartamentit të viktimës rridhte ujë në tavanin e lokalit që ishte në katin e parë.
Fillimisht ka pasur një debat me tone të larta e më pas janë përleshur fizikisht. 55 vjeçari kishte një tullë në dorë kur u qëllua për vdekje nga Alban Hyka i cili kishte marrë thikën për ta kërcënuar. Pas dy goditjeve Luan Koprencka është plagosur dhe më pas ndërroi jetë rrugës për në spital.
Thika i preku zemrën dhe goditja ishte fatale për Koprenckën.
