Euro 2016 nuk do të jetë në qendër të vëmendjes vetëm për futbollin. Një pjesë të rëndësishme të lajmeve rozë nga sporti do ta kenë edhe partneret e yjeve europianë.
Futbollistët e të gjitha skuadrave pjesëmarrëse do të ndjejnë mbështetjen e bashkëshorteve dhe të fejuarave të tyre me këto të fundit që do të kenë vëmendjen më të madhe të kronikave rozë.
Nuk do të mbetet pa u vënë re e fejuara e Yannick Carrasco, Noemie Happart fituese e Miss Belgjikës në vitin 2013. Bukuroshja 22-vjeçare e ka nisur lidhjen e saj me futbollistin e Atletico Madrid në shtator të vitit 2015.
Me shumë fat është edhe sulmuesi italian, Graziano Pelle që prej katër vitesh po jeton një histori dashurie me modelen hungareze Viktoria Varga. Padyshim nuk mund të mos përmendet në këtë pikë modelja dhe këngëtarja gjermane Ann Kathrin Brommel, e fejuara e Mario Gotze, një lidhje kjo që po zgjat prej katër vitesh.
Mesfushori Ivan Rakitic do të ketë në Evropianin e Francës, mbështetjen e bashkëshortes së tij Raquele Mauri me të cilën kanë edhe një vajzë, Altean, transmeton TCH.
Akoma më me fat në këtë pikë është Robert Lewandowski. Bashkëshortja e sulmuesit polak Anna, është instruktorja e tij personale si dhe një njohëse e mirë e arteve marciale. Robert dhe Anna Lewandowski janë martuar në 22 qershor të 2013 në Varshavë.
Gerard Pique dhe Bastian Schweinsteiger janë futbollistët që kanë në krah të tyre ndoshta bashkëshortet më të famshme. Mbrojtësi i përfaqësueses spanjolle prej gjashtë vitesh është i lidhur me këngëtaren kolumbiane Shakira, me të cilën ka edhe dy djem, Milan e Sasha. Ndërsa mesfushori gjerman që nga viti 2014 ka nisur një histori dashurie me Anna Ivanovic që konsiderohet si një prej tenisteve më të bukura në botë.
Ajo që mund të cilësohet si hyrje e re në këtë delegacion të bashkëshorteve e te fejuarave të futbollistëve është Rebekah Nicholson që përpara pak javësh kurorëzoi në martesë lidhjen e saj me sulmuesin e Leicester, Jamie Vardy.
