Deputeti demokrat Luçiano Boçi raporton në faqjen e tij në Facebook se Kryetari i Autoritetit të Mediave Audiovizive (AMA), z. Salaj, rezulton të jetë i dënuar! Sipas formularit të vetëdeklarimit, dënimi është bërë me gjobë, për kundërvajtje penale në Kosovë në vitin 2002.
Boçi sqaron se ligji i referuar është ai “PËR RENDIN DHE QETËSINЁ PUBLIKE në Republikën e Kosovës.
Neni 16 “Mospërfillja e urdhrave të ligjshëm”. Përfshirja në ligjin e dekriminalizimit duket e debatueshme, sepse vepra kundërvajtje penale është kryer jashtë territorit të Republikës së Shqipërisë.
Por ajo që përbën një problem ligjor sqaron deputeti Boçi është se ky është një fakt që i është fshehur Komisionit të Edukimit dhe mjeteve të informimit publik, në momentin kur z. Salaj paraqiti kandidaturën e tij. Komisioni duhet të ishte ai që do ta çmonte këtë fakt dhe përputhjen e tij me ligjin. Ligji pengon zyrtarë të lartë të organeve të pavarura kushtetuese të kandidojnë, kur janë të dënuar për vepra penale. Profili i veprës sigurisht ka peshën e vet. Ka nevojë për interpretim, por ky interpretim është shmangur.
“Në rast kryerje detyrohen të dorëhiqen. Fshehja e këtij fakti si dhe konstatimi i kryerjes së tij me anë të formularit të vetëdeklarimit, janë kushte të mjaftueshme, që zoti Salaj të dorëhiqet”- përfundon argumentimin e tij deputeti demokrat Luçiano Boçi.
