Kryetari i Frymës së Re Demokratike, Bamir Topi kërkoi sot nga ish ministri i Brendshëm demokrat, Flamur Noka, të sqarojë lidhjet e tij me sherbimin e inteligjencës serbe. Gjatë mbledhjes së Asamblesë Kombëtare të FRD, ish kreu i Shtetit theksoi se Sali Berisha ndryshoi në 2006-ën draftin për ligjin e hapjes së dosjeve, për të mbrojtur, sipas tij, personat që i përkisnin shërbimeve të huaja agjenturore.
“Mbi bazën e disa të dhënave që s’janë të miat por janë të ekspozuara, ish Ministri i Brendshëm ka një suspekt të fortë që duhet t’i sqarojë, për lidhjet me Shërbimin Sekret Jugosllav. Me shërbimin informativ serb. I takon atij t’i sqarojë. Dhe po i kthehem një pyetje që e kam bërë në momentin kur isha President. Ka qenë një qëndrim konstant nga ana ime për hapjen e dosjeve të Sigurimit të Shtetit. Pse ndryshoi drafti i vitit 2006-ë? Ai draft kishte dy autorë, personin tim dhe zotin Majko. Dhe në vitin 2008-ë, erdhi në një formë tjetër. Dhe pyetja ka qenë e drejtpërdrejtë për ish-kryeministrin, pse brenda draftit ligjor, zotëri, nuk e fut kategorinë e bashkëpunëtorëve të agjenturave të huaja? Përgjigjen s’e mora asnjëherë. E di ai…”, u shpreh Topi, duke theksuar se historia e bashkëpunëtorëve të agjenturave të huaja është një fenomen i cili e ka shoqëruar këtë vend gjithmonë me shumë dyshime.
Kreu i FRD ironizoi edhe politikanët që kanë ndryshuar emrin. Sipas tij, kjo është krizë e madhe morale e dramatike. “Në rast se ne sot duhet të hyjmë në Europë, duke qenë vend i NATO-s, atëherë ku duhet të fillojë kjo transparencë? Me njerëzit që ndryshojnë emrat, mbiemrat… Ka qenë një film “Duaje emrin tënd”. Kur nuk do emrin tënd, nuk mund ta duash tjetrin. Është një krizë morale e dramatike. Dhe pastaj kemi të njëjtët aktorë që dalin e marrin kontakte”, tha Topi.
Si i takon reformës në drejtësi, Topi theksoi se kryeministri Rama duhet të dërgojë draftin në Kuvend për miratim dhe jo t’i lutet PD-së. Nëse Kuvendi dështon, tha ai, atëherë reforma në drejtësi të shkojë në referendum.
“Unë i bëj një thirrje me atë cilësi që thash në fillim, që zoti Rama që është kryetar i mazhorancës, duhet t’i lejë lutjet dhe duhet që drafti i supervizuar nga Venecia të hyjë në parlament. Ky është propozimi ynë. Njerëzit nuk kanë nevojë të dëgjojnë nga selitë e partive politike, por të dëgjojnë nga tempulli të cilin ata e kanë ndërtuar nëpërmjet votës së tyre, ndonëse vota e elektoratit mund të ketë qenë e deformuar, se ndryshe nuk do të kishim një parlament të tillë”, tha Topi.
Deklaratat e Bamir Topit u bënë gjatë mbledhjes së Asamblesë Kombëtare të Frymës së Re Demokratike ku u diskutua për çështje organizimi të kësaj force politike në bazë.
