Kandidatja demokrate për presidente në SHBA, Hillary Klinton nuk ka zbatuar rregullat e Departamentit të Shtetit në lidhje me përdorimin e adresës private elektronike në çështjen e shumëpërfolur të e-maileve. Ky është konkluzioni i Inspektorit të Përgjithshëm në departamentin e shtetit.
“Minimumi që duhet të bënte është të dorëzonte të gjitha e-mailet që kishin lidhje me çështjet e departamentit, përpara se të largohej nga detyra si sekretare e shtetit amerikan, por ajo nuk e bëri këtë duke mos respektuar rregullat e brendshme “, shkruhej në raportin e inspektorit.
Në këtë raport gjithashtu shkruhej se sekretari aktual i shteti John Kerry, por edhe paraardhësit e Klintonit në këtë post Collin Powell dhe Condoleca Rice u morën në pyetje në lidhje me këtë çështje, ndërkohë që vetë kandidatja për president nuk ka pranuar të japë shpjegime përpara inspektorit të përgjithshëm.
Clinton është kritikuar ashpër për përdorimin e adresës personale elektronike për çështje pune në periudhën kur shërbente si sekretare e shtetit amerikan, pra nga viti 2009 deri në vitin 2013.
Byroja Federale po heton nëse Klinton ka thyer apo jo ligjin në momentin kur ka përdorur serverin e shtetit nga banesa e saj.
