Fabio Capello, ish-trajneri i Real Madrid, ka shprehur bindjen e tij se Atletico Madrid do të fitojë Champions League. Me rastin e marrjes së çmimit për karrierën nga “Football Leader”, ish-tekiniku i Rusisë ka folur për tema të ndryshme, duke filluar nga finalja e afërt e Champions League, që do të luhet të shtunën në mbrëmje në “San Siro”.
“Real Madrid ishte një nga skuadrat e mia të preferuara për të ngritur trofeun. Por, për sa i takon karakterit, Atletico ka diçka më shumë në krahasim me Real dhe skuadrat e tjera. Simeone e ka ekipin në dorë, është lideri, lojtarët e ndjekin, po bën një punë shumë të mirë pavarësisht ndryshimit të vazhdueshëm të lojtarëve”. Përsëri një finale spanjolle, si dy vite më parë… “E njoh atë lloj futbolli, besoj se Zidane ka cilësitë e duhura për t’i thënë gjëra të caktuara lojtarëve që e dëgjojnë. Gjithsesi, nuk shikoj një diferencë shumë të madhe mes skuadrave italiane dhe atyre të huaja, siç ka treguar edhe ndeshja e Juventus kundër Bayern”.
Europiani po afrohet: çfarë parashikimi mund të bëni për Italinë?
“Italia ka një bazë të Juventus-it, lojtarë me dëshirë për të fituar, punuar, luftuar. Një pikënisje e rëndësishme. Një tjetër pikë thelbësore është gjendja e mirë fizike. Në fund të kampionatit nuk janë të gjithë të freskët, por është e rëndësishme për të qenë kompetitiv. Grupi i Juventus-it e di mirë se ku do të arrijë Conte dhe ia bën detyrën akoma më të lehtë. Unë nuk do të doja të flisja për lojtarët individualisht, kjo është detyra e trajnerit, i cili i ndjek nga afër dhe i vlerëson”.
Moviola në fushë ka qenë një nga temat më të diskutuara të sezonit: cili është mendimi juaj?
“Ne flasim për arbitrat dhe për moviolën. Por, në fakt, janë shumë kolegë që nuk e duan në fushë. Nëse më pas të ndodh siç i ndodhi Liverpool-it, të vjen keq. Në të gjitha sportet teknologjia është e përfshirë. Futbolli është më pak i predispozuar ndaj ndryshimit”.
