Aktivisti Eljan Tanini i shoqërisë civile që ngriti zërin dhe protestoi kundër parkut të lodrave tek Liqeni Artificial është shpallur fitues i një konkursi të organizuar nga Bashkia e Tiranës.
Edhe pse aktivistët, pjesë e tyre Eljon Tanini, e “akuzuan” kryebashkiakun Erion Veliaj si përgjegjësin kryesor për masakrën që ata pretendojnë se po i bëhet kurorës së gjelbër të kryeqytetit, kjo nuk ka bërë që fituesi t`i shtrëngoj dorën në formë miqësore Veliajt.
Kjo foto është shkrepur gjatë një ceremonie të organizuar nga Bashkia ku u përzgjodhën 4 fituesit e parë të konkursit për Skulpturat e Parkut, vepra të krijuara nga artistë të rinj që do të vendosen në parqet kryesore të kryeqytetit. Ky shtrëngim duarsh nuk ka qenë aq i rastësishëm, pasi Eljan Tanini është përzgjedhur mes fituesve të këtij konkursi me veprën e tij “Raketa”, një ide mjaft origjinale që do të marrë jetë në parkun e ish-fushës së Aviacionit.
“Ëndrra Fëmijërie. Kjo është një ndër katër veprat fituese në konkursin e Skulpturave të Parkut, organizuar nga Bashkia e Tiranës. E falenderoj jurinë profesioniste, dhe të gjithë ata që e kuptuan idenë time për ta dashur këtë qytet. Kjo vepër është prezantuar edhe më parë, por askush nuk pati vullnetin ta kuptonte. Si shenjë e memories kolektive, do të vendoset te Ish Fusha e Aviacionit”, shkruan Tanini në profilin e tij në rrjetin social Facebook.
Nuk dihet nëse kjo është një shenjë “paqeje” edhe për parkun tek Liqeni, por duket se protesta dhe ngritja e zërit në kauza që i mendojmë se janë të drejta për vendin, nuk ka ndikuar aspak në vlerësimin e një talenti.
