Partia Demokratike ka dënuar dhunimin e gazetarit Genc Pishtari nga policia bashkiake dhe ajo e rendit. Në një deklaratë për mediat, deputeti i PD, Luçiano Boçi tha se ky akt tregon arrogancën e një pushteti të degraduar e të dalë duarsh.
“I ndodhur në ngjarje dhe duke filmuar aktin e dhunimit te një gruaje 60-vjecare, shitëse ambulante në një nga rrugicat e Tiranës, gazetari i CityNews Genci Pishtari, ka rënë pre e dhunës së policëve Bashkiake dhe më pas atyre të Rendit. Madje duke “e plasur” atë në birucat e Komisariatit nr. 4. Banditizmit policesk që tashmë lëviz e koordinohet në linjën Polici Bashkiake-Polici e Rendit, ndaj gazetarit të CityNews, dukshëm tregon arrogancën e një pushteti të degraduar në çdo qelizë, e një pushteti të dalë duarsh e mendsh! Të jesh sot gazetar në Shqipëri nuk është e lehtë. Të jesh gazetar denoncues i padrejtësive, i dhunës, i aferave, koncensioneve zhvatëse, korrupsionit, në vendin tonë po bëhet gjithnjë e më e pamundur!! “Junta” policore e Ramës nuk të lë të ushtrosh profesionin tënd siç bëri sot me Genc Pishtarin dhe siç ka bërë me shumë të tjerë përgjatë këtyre tre viteve”, deklaroi Boçi.
Sipas tij, “Junta ka frikë nga gazetaria e lirë dhe kërkon ta mbyllë atë komisariateve, ta përgjojë e ta linçojë”.
“Junta i trembet së vërtetës prandaj, kërcënon, dhunon e burgos. Junta s’ka arsye. Ajo ka vetëm urrejtje për qytetarët e saj dhe për ata që mbrojnë qytetarët! Bandidizmi me uniformë policie i turret fjalës së lirë sikur kjo të ishte figurë krimi dhe jo figura e së vërtetës. Arrestimi dhe dhunimi i Genc Pishtarit, është ulërimë për lirinë e medias dhe nivelin e demokracisë, por dhe njëkohësisht grahma e një pushteti qesharak që numëron me ankth rënien e merituar”, tha ai.
Boçi kërkoi lirimin e menjëhershëm të gazetarit
“Sot krimi ka çelësat e shtetit që mbyllin portat e qelive ndërsa gazetarëve dhe qytetarëve u janë lënë vetëm qelitë. PD dënon aktin e ndalimit të gazetarit Genci Pishtari të bërë sot dhe kërkon lirimin e tij të menjëhershëm! Së paku Rama të vendosë një arnë në flamurin e bërë shoshë të pushtetit të tij të grisur!”, tha ai.
