Të tjera të dhëna për bandën e drogës që drejtohej nga Klemend Balili. Mediat helene duke cituar zyrtarë të Europol dhe policisë greke thonë se hetimet për “Escobarin” e Ballkanit kanë filluar që 1 vit më parë, por se nuk ka pasur arrestimet për mungesë provash. Aq më tepër policia greke flet për mbyllje dyersh nga homologët e tyre.
Siç bëhet e ditur, policia greke në bashkëpunim me DEA-n amerikane kanë kryer hetime prej 1 viti për organizatën ndërkombëtare të drogës të drejtuar nga i ashtuquajturi ‘Escobari shqiptar’, Kelmend Balili.
Europol thotë se në hetime nuk ishte përfshirë policia shqiptare, ndërsa hetuesit grekë kishin filluar të shkëmbenin informacione me homologët në Belgjikë, Holandë, Gjermani dhe Britani, për shkak se në këto vende banda trafikonte sasi të mëdha kanabisi dhe kokaine.
Një polici grek tha për portalin “Newsit.gr” se “në Evropë të gjithë e dinin për disa prej tyre (anëtarët e bandës) dhe aktivitetet që ata kryenin, por nuk kishin prova për t’i arrestuar. Këto informacione ju dhanë nga policia greke, pas hetimeve që bëri për çmontimin e rrjetit të drogës”.
Portali vijon më tej se drejtuesi grek i hetimeve për këtë bandë të drejtuar nga 44-vjeçari shqiptar, do të shkojë gjatë fundjavës në Hagë ku ndodhet selia e Europol, për t’i dorëzuar kolegëve europianë dokumentet e hetimit, dhe që sipas tyre, ata hasën në “dyer të mbyllura” për çmontimin e organizatës së Baronit shqiptar të drogës.
Nuk dihet se drejt kujt janë adresuar ankesat e hetuesve grekë, nëse bëhet fjalë për policinë shqiptare që nuk veproi për arrestimin e Klemend Balilit.
Zyrtarisht Balili është shpallur dje në kërkim ndërkombëtar nga Greqia.
