Drejtori i Përgjithshëm i Policisë së Shtetit Haki Çako ka folur për herë të parë për “Baronin e Ballkanit” dhe organizatën ndërkombëtare të drogës që drejton.
“Kam dijeni, është operacion i përbashkët me policinë amerikane të drogës DEA-n, policinë greke dhe disa partnerë. Është një nga operacionet me të suksesshëm në luftë kundër krimit të organizuar.
Ka shumë më shumë se sa thuhet në aspektin investigativ. Është bërë shumë zhurmë për këtë gjë. Subjektet nuk mund t’i komentoj për shkak të hetimit dhe karakterit që ka çështja. Janë hetime, brenda dhe jashtë Shqipërisë. Janë personazhe të botës së krimi”, u shpreh Haki Çako.
Drejtori i Policisë komentoi edhe akuzat e mediave greke dhe të PD se “Baroni i Ballkanit” është kreu i Transporteve në Sarandë, Kelmend Balili. Për këtë të fundit, Çako tha se nuk kishte asnjë koment, ndërsa dje Policia e Shtetit deklaroi publikisht se merr pjesë në këtë operacion antidrogë të Policisë Greke dhe DEA-s, por nuk jep informacion.
Këto komente, Haki Çako i bëri nga sheshi ‘Nënë Tereza’ ku po zhvillohej aktiviteti i përfundimit të trajnimit të skuadrës së motorçiklistëve të policisë. /SYRI.net/
