Shtëpia ku u qëllua me armë zjarri, në mesnatë rreth orës 01.00 në Durrës, dhe u plagos fëmija 12 vjeç, është e Denis Shtrazës, të riut që gjendet i arrestuar si i dyshuar për marrjen peng dhe vrasjen e Gazmend Çollakut më 5 janar të këtij viti.
Si pasojë e të shtënave ka ngelur i plagosur një fëmijë 12-vjeçar nga një plumb rikoshet.
Ngjarja ka ndodhur gjatë ditës së sotme në lagjen numër 1 të qytetit bregdetar. Sipas policisë ndaj banesës së shtetasit me iniciale D.Sh është qëlluar me armë zjarri.
Fëmija 12 vjeçar ndodhet në spital jashtë rrezikut për jetën.
Specialistët për Krimet dhe grupi hetimor po kryejnë veprimet për identifikimin dhe kapjen e autorëve si edhe zbardhjen e plotë të ngjarjes.
