Prej 24 orësh lajmi për vrasjen horror të një të riu shqiptar ka pushtuar mediat, sidomos ato online. Me dëshirën e mirë për të informuar sa më parë publikun dhe për pasqyrimin e të vërtetës, padashur mediat shkaktuan një dramë.
Kjo pasi emri i viktimës që u gjet në Gliki të Igumenicës ishte i njëjtë me të një të riu tjetër, familja e të cilit u shqetësua së tepërmi. Këtë e pohoi edhe vetë i gjalli, Bledar Tërpollari i cili jeton në Tiranë duke shprehur shqetësimin për telefonatat e pafundme që ka marrë nga të afërmit e shqetësuar pas lajmit makabër. Madje Tërpollari kërcënon mediat me gjyq.
Në fakt mediat kishin vetëm emrin, mbiemrin dhe moshën e viktimës por mungonte emri i babait të viktimës. Sigurisht informacionin zyrtar mund ta jepte vetëm policia shqiptare që në këtë rast nuk është ndjerë fare.
Pavarësisht krimit tepër të rëndë, nga policia nuk ka patur asnjë të dhënë për viktimën që u tha se kishte qenë madje i dënuar pë vjedhje në Shqipëri, ndërkohë që deri tani duhet të kishte zbuluar edhe informacionet e policisë greke për autorë të mundshëm për të pasur një ide se si ka ndodhur vrasja.
Policia shqiptare ka zbuluar shpesh atësinë e personave të arrestuar për vjedhje apo edhe disa gramë kanabis por në këtë rast është inekzistente për të dhënë informacione duke e lënë gjithçka në dorë të profesionalizmit të gazetarëve.
25-vjeçari Bledar Kujtim Tërpollari u gjet i vrarë dhe me kokë të prerë në Igumenicë, ndërsa mediat greke e kanë lidhur vrasjen me pazaret e drogës, duke sfumuar kështu një makabritet. Madje mediat greke sërish shkruajnë se viktima kishte qenë i dënuar në Shqipëri për vjedhje dhe sapo ishte liruar nga burgu.
