Ministri i Drejtësisë, Ylli Manjani ka reaguar pas denoncimit të bërë publik nga ish-kryeministri Sali Berisha për Drejtorin e Përgjithshëm të Burgjeve, Artur Zoto.
Manjani fton denoncuesin që të paraqitet dhe të vendosë një kontakt të drejtpërdrejtë me Ministrinë e Drejtësisë për ta paraqitur rastin, duke krijuar mundësinë e shqyrtimit të tij në rrugë zyrtare.
Ministri i Drejtësisë deklaron se është e nevojshme të njihet me pretendimet e denoncuesit dhe premton se do të ketë masa nëse akuzat provohen.
“Përsa me sipër, Ministri Manjani bën me dije se është e nevojshme të njihet nga afër me pretendimet e denoncuesit me qëllim që të bëhen verifikimet e nevojshme. Duke siguruar se denoncimi i qytetarit do të hetohet me detaje, Ministri i Drejtësisë shpreh gatishmërinë për të marrë të gjitha masat që parashikon ligji nëse detajet e bëra publike rezultojnë të provuara. Ministri Manjani siguron maksimalisht denoncuesin se do të ketë garancinë e nevojshme të ruajtjes së anonimatit të tij”, thuhet në përgjigjen e Manjanit.
