Grupi hetimor i Prokurorisë së Tiranës që po verifikon akuzat e ngritura nga Policia e Tiranës dhe Drejtorisë së Pastrimit të Parave për ish -kandidatin e Bashkisë së Tiranës, Gjergj Bojaxhi i ka kërkuar bankave të nivelit të dytë se kanë dy javë kohë për t`i dorëzuar të dhënat e tij.
Gjergj Bojaxhi akuzohet për veprat penale “Mashtrim me Kredi”, “Pastrimit të produkteve të Veprës Penale apo Veprimtarisë Kriminale” dhe “Fshehje të Ardhurash”. Prokuroria Tiranës iu drejtua 2 javë më parë me një kërkesë për informacione të detajuara disa bankave.
Sipas ligjit ato duhet t’i përgjigjen organit të akuzës brenda muajit.
Përveç identifikimit të llogarive bankare të Bojaxhiut, prokurorët kërkojnë nga bankat të identifikojnë edhe llogaritë e të afërmve të tij, apo dhe kompanive të lidhura me ta, përsa u përket transaksioneve të kryera në mënyrë analitike, që nga krijimi i tyre.
Burime të Televizionit Klan mësuan se prokurorët që po hetojnë këtë dosje i janë drejtuar edhe Drejtorisë së Tatimeve, ku kërkohet verifikimi i të gjitha veprimeve që ka kryer Bojaxhi si admnistrator i kompanisë “Everest Oli” dhe nëse janë shlyer të gjitha detyrimet ndaj shtetit.
Në vorbullën e institucioneve të përfshirë në hetim është edhe QKR, që po verifikon përputhjen e të dhënave në sistem me veprimet e kryera në terren prej Bojaxhiut me kompaninë e tij, që ka qarkulluar miliona dollarë.
