Kadri Veseli është zgjedhur Kryetari i ri i Partisë demokratike të Kosovës. Në votimin e hapur, të gjithë delegatët e kanë votuar atë.
Sekretari i PDK-së, Basri Musmurati kërkoi që votimi të jetë i hapur. Në fjalimin e tij në Konvetën e VII zgjedhore të PDK-së, Veseli ka kërkuar që t’i jepet mundësia edhe ndonjërit nga anëtarët e partisë që të kandidojë për Kryetar.
Pas marrjes së besimit për drejtimin e partisë nga delegatët në Konventen e Shtatë të partisë, Veseli ka thënë se PDK-në e presin shumë sfida – si partia më e madhe në vend – në drejtim të ofrimit të një jete më të mirë për qytetarët e vendit.
Ai fjalën e tij para delegatëve nisi me falënderim për besimin që iu dha.
“Jeta më ka mësuar se asgjë më të shenjtë nuk ka sesa besimi i njeriut dhe faleminderit për këtë besim, do të jem mirënjohës gjithmonë”, tha Veseli.
Ai që në hyrje të fjalës së tij falënderim special pati për ish kryetarin e PDK-së, Hashim Thaçi.
“Falënderimi i parë shkon për njeriun që e udhëhoqi, ndërtoi dhe krijo PDK-në, presidentin e Republikës së Kosovës Hashim Thaçin”, tha kryetari i ri i PDK-së.
Veseli ka theksuar se orientimi i partisë do të vazhdojë të mbetet i njëjtë, njofton Klan Kosova.
“Do të jem shumë i drejtpërdrejtë dhe shumë i përgjegjshëm – bashkë me ju na presin shumë sfida. Do të fillojmë menjëherë të punojmë. Aty ku i kemi punët mirë, do të punojmë edhe më mirë. Aty ku kemi ngecje do të përmirësohemi, që të bëjmë edhe më shuëm për qytetarin e Kosovës”, tha ai.
“Do të vazhdojmë aleancën e përhershme dhe strategjike me ShBA-në, si dhe rrugën tonë drejt anëtarësimit në Bashkimin Europian dhe NATO”.
“Sfidë edhe më e madhe për të gjithë ne, por për mua si kryetar i partisë do të jetë ofrimi i një jete më të mirë për qytetarin e Kosovës, sigurim shëndetësor, arsim më të mirë”.
“Ne jemi parti e qendrës së djathtë, do të vazhdojmë në këtë drejtim – deri në anëtarësimin në Bashkimin Europian. Sado që do të na kushtojnë, çfarëdo që të na kërkohet, nuk do të ketë rrugë tjetër veç gjetja e asaj për zhvillimin ekonimik të vendit”.
“Falënderim dhe mirëkuptim për qytetarët e vendit që shpesh po tregojnë pjekuri më të madhe se disa nga politikbërësit. Zoti na ndihmoftë të gjithëve”, tha kryetari i PDK-së.
