Policia e Tiranës ka bërë të mundur arrestimin e 39 vjeçarit Oltion Nurçe, banues në Tiranë, i dënuar më parë për vjedhje.
Sipas policisë Nurçe dyshohet se ka vjedhur 5 banesa nga muaji mars deri më sot. Vjedhja e fundit e tij para 3 ditësh ishte në banesën e shtetases E. Sh., 51 vjeçe, banuese në Tiranë, ku janë marrë 260.000 lekë në rrugën “Tish Daia”.
Njoftimi i policisë:
Ndalimi i këtij shtetasi u bë pasi dyshohet si autor i vjedhjes me thyerje të banesës së shtetasit B. A., ndodhur më datë 20.04.2016 në rrugën Sali Butka”.
Gjithashtu ky shtetas në bashkëpunim me shtetasin Xh. H., i cili u shpall në kërkim nga ana jonë dyshohet se janë autorë të disa vjedhjeve të banesave me mekanizmin e thyerjes së fishekut të derës.
Falë veprimeve profesionale dhe hetimore të kryera nga Specialistët për Hetimin e Krimit është bërë e mundur dokumentimi ligjor i disa vjedhjeve të kryera më parë:
- Më datë 22.03.2016, në rrugën “Frederik Shiroka”, është vjedhur banesa e shtetasit Y. K., 77 vjeç, banues në Tiranë, ku janë marrë një varëse floriri, një unazë dhe nje sasi prej 150.000 lekësh.
- Më datë 28.03.2016, në rrugën “Zef Jubani”, është vjedhur banesa e shtetasit A. B., 41 vjeç, banues në Tiranë, ku janë marrë shuma e 35.000 lekëve dhe disa bizhuteri të ndryshme.
- Më datë 24.04.2016, në rrugën “Muhamet Gjollesha”, është vjedhur banesa e shtetasit E. Sh., 32 vjeç, banues në Tiranë, ku janë marrë një lap-top dhe disa bizhuteri të ndryshme.
- Më datë 27.04.2016, në rrugën “Irfan Tomini”, është vjedhur banesa e shtetases D. K., 45 vjeçe, banuese në Tiranë, ku janë marrë tre kompjutera “Lap-top”, një telefon celular tip “Samsung Galaxy”, një shumë prej 400 euro, 30.000 lek dhe disa bizhuteri.
- Më datë 04.05.2016, në rrugën “Tish Daia”, është vjedhur banesa e shtetases E. Sh., 51 vjeçe, banuese në Tiranë, ku janë marrë 260.000 lekë.
Materialet proceduriale i kaluan Prokurorisë së Rrethit Gjyqësor Tiranë, për veprën penale të “Vjedhjes së kryer në bashkëpunim, më shumë se një herë”, parashikuar nga neni 134/2 i Kodit Penal .
