Shqipëria ka strehuar 16 refugjatët e parë sirianë që kanë mbërritur në vendin tonë. Këtë e ka bërë të ditur burime zyrtare nga Ministria e Brendshme të cilat thanë se, 16 refugjatët janë strehuar në qendrat e pritjes së Ministrisë së Brendshme, edhe pse ata kanë kërkuar që të kthehen për në Greqi nga ku janë nisur.
Njoftimi i Ministrisë së Brendshme:
Sot në orën 13:00 në Kapshticë nga patrulla e shërbimit në fshatin Vernik, rrethi Devoll, u kapën 16 shtetas sirianë. Nga këta të rritur 4 meshkuj, 3 femra, dhe 9 te mitur midis tyre dhe një foshnje 2-muajshe.
Gjate intervistimit paraprak te tyre rezultoi se shtetasit e mësipërm, duan të vazhdojnë udhëtimi për në Serbi dhe me pas udhëtimin e mëtejshëm për në Gjermani.
Shtetasit kanë qenë në kampin e Idomenisë dhe që atje janë larguar për në drejtim të Selanikut, nga ku kanë marre dy taksi për t’iu afruar kufirit tone.
Me pas kanë udhëtuar 16 km për rreth 12 orë deri në çastin që janë kapur nga patrulla e policisë kufitare të stacionit Kapshticë.
Sipas intervistimit u shprehen se kanë paguar nga 50 euro taksive për të ardhur deri afër kufirit.
Autoritetet shqiptare shoqëruan për në Stacionin e Kapshticës migrantët, ku iu është ofruar ushqim dhe veshje dhe janë akomoduar në ambientet e këtij stacioni.
Disa prej tyre janë transportuar për në spital pasi kanë pasur probleme me shëndetin (tension, marrje mendsh) nga mos-ushqyrja, rruga e gjatë dhe moti i vështirë me reshje.
Ata kanë marrë mjekimin e nevojshëm dhe përkujdesjen shëndetësore. Këta persona do të strehohen në qendrat për refugjatet dhe migrantët në varësi të Ministrisë së Punëve të Brendshme.
Shtetasit nuk kërkojnë azil në vendin tonë, por duan të kthehen në Greqi, por gjendja e tyre shëndetësore nuk është e mirë, pasi në mesin e tyre janë 9 shtetas të mitur, ndaj po mbahen nën kujdesin e vazhdueshëm të strukturave të MPB.
