Diego Simeone i ka dhënë goditjen e dytë radhazi “tiki-taka”, lojës me të cilën identifikohet Barcelona. Fillimisht eliminoi skuadrën e Luis Enrique, në çerekfinale të Ligës së Kampioneve, pastaj bavarezët e Pep Guardiolës, në gjysmëfinale. Pra, u vërtetua ajo që paralajmëronte “Gazzetta dello Sport”, se “colissmo” është filozofia që po likujdon “tiki-taka”.
Sajti i mirënjohur “442oons”, kanal në youtube, nuk ka humbur rastin për ta parë në këndvështrimin humoristik këtë gjë, duke e materializuar me një “video-cartoons” gjysmëfinalen e kthimit, që u luajt mbrëmë në “Allianz Arena”. Duke u fokusuar te momentet pikante, golat dhe detaje të tjera të sfidës Bayern Munich-Atletico Madrid 2-1, ky kanal ka përqasur Diego Simeonen me Guardiolën, por edhe atë që prodhoi fusha e blertë. Një parodi e shkëlqyer, veçanërisht, në lidhje me minutat e fundit të ndeshjes, ku spanjollët vononin për të siguruar finalen e Milanos, ndërsa bavarezët nuk e shmagnin dot kaosin psikologjik të daljes jashtë kompeticionit më të rëndësishëm për klubet në Europë.
