Policia e Tiranës arrestoi sot një person të shpallur në kërkim për ngjarjet e vitit të kaluar në Lazarat, por gjatë ndalimit, 31-vjeçari Bako Buzheri goditi me grusht një efektiv, çka solli edhe qitjen në ajër të bluve.
Ndërkaq policia jep detaje të tjera nga operacioni i zhvilluar në zonën e “Zogut të zi”.
Në bazë të informacioneve të marra në rrugë operative se në afërsi të Sheshit “Karl Topia” po lëvizte një shtetas nga Lazarati i cili dyshohet për person në kërkim, me rrezikshmeri kriminale, menjëherë janë organizuar shërbimet e Komisariatit të Policisë Nr. 2, për të bërë të mundur ndalimin e shtetasit të dyshuar.
Në momentin që punonjësit e policisë janë prezantuar si dhe kanë nxjerrë dokumentin identifikues Policor, shtetasi i për të cilin ishte marrë informacion në rrugë operative, Bako Buzheri, 31 vjeç, nga Lazarati, i cili ishte i shoqeruar me shtetasin Tahir Brahimi, 30 vjeç, ka kundërshtuar dhe goditur me grusht punonjësit e policisë.
Në këto momente njëri nga punonjësit e policisë është detyruar të bëjë qitje në ajër me armën e zjarrit duke thirrur “Policia Kriminale, Mos Lëvizni”.
Sapo është bërë i mundur neutralizimi i këtyre shtetasve, Bako Buzheri, ka nxjerr një sasi të dyshuar si lëndë narkotike “Cannabis Sattiva”, dhe e ka gëlltitur.
Punonjësit e policisë kanë bërë të mundur që të sekuestrojë një pjesë të kësaj lënde narkotike.
Gjatë kontrollit fizik të shtetasit Tahir Brahimi policia gjeti dhe sekuestroi një numër te konsiderueshëm fara të dyshuara narkotike.
Shtetasi Bako Buzheri, ka qenë i dënuar më parë nga Gjykata e shkallës së Parë për Krimet e Rënda , me 21 vite heqje lirie për veprat penale, “Heqje e padrejtë e lirisë” dhe “Shtrëngim për dhënie pasurie”, por është lënë i lirë duke u shpallur i pafajshëm nga Gjykata e Lartë.
Në përfundim të veprimeve të para hetimore u bë arrestimi në flagrancë i dy shtetasve të lartpërmendur dhe materialet procedurale do t’i kalojnë Prokurorisë pranë Gjykatë Shkallës së Parë Tiranë, për veprën penale “Prodhim dhe Shitje e narkotikeve në bashkëpunim” dhe “Kundërshtim me dhunë i punonjësve të policisë”.
