Sot, një ditë pas arrestimit të gjyqtarit, do të zhvillohej gjyqi për çështjen që Ibrahim Hoxha morri ryshfetin.
Mësohet se Hoxha kishte rënë në kontakt me një palë në konflikt gjyqësor për një pronë dhe u kishte premtuar të mbante anën e tyre.
Ibrahim Hoxha, gjyqtari i Gjykatës së Tiranës, ishte nën hetim prej 6 muajsh. Sektori për Korrupsionin në Drejtorinë e Policisë së Tiranës në bashkëpunim me Krimet e Rënda e kishin nën përgjim dhe nën vëzhgim.
Pala në konflikt gjyqësor ishte biznesmeni Dritan Jazexhiu nga Tirana. Ndërmjetës mes tij dhe gjyqtarit ishte Novruz Gajda, ish –efektiv i policisë së Beratit, i lindur në këtë qytet dhe banues në Tiranë. Që të dy janë vënë në pranga së bashku me djalin e gjyqtarit, 25 –vjeçarin Ledion Hoxha.
Mbrëmë gjyqtari, i biri dhe ish –polici u kapën në flagrancë në një lokal teksa pala në gjyq po i jepte gjyqtarit 600 mijë lekë të reja. U arrestua edhe biznemeni.
Paratë i kishte Novruz Gjata. Ai do t’ia jepte ato gjyqtarit me qëllim që Dritan Jazexhiu ta fitonte çështjen gjyqësore, që pritej të shpallej sot (3 maj) në orën 9.30 në Gjykatën e Tiranës.
Ish –polici i kishte marrë pratë nga biznesmeni dhe Prokuroria e Krimeve të Rënda thotë e ka të provuar këtë fakt.
Bashkë me paratë, u sekuestrua edhe një makinë tip Benz me targa AA 005 NC.
Prokuroria e Krimeve të Rënda ka ngritu ndaj gjyqtarit Hoxha akuzën për “Korrupsion pasiv i gjyqtarit prokurorit dhe funksionarëve të tjerë të Drejtësisë ”. Ndërsa tre të tjerët akuzohen për “Korrupsioni aktiv të gjyqtarit, prokurorit dhe funksionarëve të tjerë të Drejtësisë ” dhe “Ushtrimi të ndikimit të paligjshëm ndaj personave që ushtrojnë funksione publike ”.
TË DHËNAT E TË ARRESTUARVE
- Ibrahim Hoxha, 57 vjeç, lindur në Berat dhe banues në Tiranë, me detyrë Gjyqtar pranë Gjykatës së Rrethit Gjyqësor Tiranë.
- Ledion Hoxha, 25 vjeç, lindur në Berat dhe banues në Tiranë, me detyrë Jurist në një firmë.
- Dritan Jazenxhiu, 48 vjeç, lindur në Tiranë dhe banues në Tiranë, biznesmen.
- Novruz Gajda ,48 vjeç, lindur në Berat dhe banues në Tiranë, (ish polic në Drejtorinë e Policisë Qarkut Berat).
