Sulmuesi i Leicester, Jamie Vardy, është vlerësuar me çmimin lojtari i vitit për sezonin 2015/16 nga Shoqata e Gazetarëve Sportiv.
Lojtari i kombëtares angleze e ka marrë këtë çmim pasi shoku i tij i ekipit Riyad Mahrez është shpallur lojtari më i mirë i vitit në këtë sezon të Premier League javën e kaluar. Vardy, i cili ka shënuar 22 gola në këtë sezon duke ndihmuar Leicester të shkojë një hap larg titullit të parë në kampionatin anglez, ka fituar garën me shokët e skuadrës N’Golo Kante dhe Mahrez. Në total kanë qenë shtatë lojtarët e “Dhelprave” të nominuar për të marrë vlerësimin, teksa Vardy është bërë lojtari i parë në historinë e klubit që e fiton këtë çmim.
“Është një nder i madh për mua që e kam fituar këtë çmim dhe jam bërë pjesë e një grup unik lojtarësh që e kanë fituar këtë vlerësim para meje. Dua të falënderoj të gjithë ata që kanë votuar për mua dhe shokët e mi të skuadrës, të cilët janë arsyeja e vërtetë e suksesit tim. Ka qenë një sezon i jashtëzakonshëm për të gjithë ne, falë punës së skuadrës dhe jo aftësive individuale. Dua të falënderoj edhe trajnerin, të gjithë stafin dhe tifozët për mbështetjen e tyre. Jemi të përqendruar ta kalojmë vijën e finishit të parët dhe ta kthejmë këtë sezon të madh në të paharrueshëm. Shpresoj që të jap kontributin tim dhe të jem në formë edhe për Europianin”, ka thënë Vardy.
