Një gjë është e sigurt, harta e destinacioneve këtë verë do të ndryshojë tërësisht dhe shkak është bërë kriza e refugjatëve dhe aktet terroriste. Shqiptarët gjithashtu duhet të njohin këto tendenca për të shmangur përvojat negative.
Të dhënat e Këshillit Botëror të Turizmit dhe Udhëtimit (WTTC) raportojnë se Spanja parashikon që të ketë një numër rekord turistësh këtë sezon. Rritja e kërkesës mbështetet kryesisht nga paqëndrueshmëria e destinacioneve të tjera konkurruese, si Tunizia, Egjipti dhe Turqia. Në këto kushte pasiguria ka ndryshuar ndjeshëm sjelljen e turistëve.
Në katër muajt e parë të këtij viti Spanja si destinacion turistik shënoi rritje të numrit të turistëve me rreth 4.4% krahasuar me të njëjtën periudhë të një viti më parë. Në të njëtjën periudhë rreth 90,000 vende të reja pune janë krijuar. Kjo industri kontribuon me rreth 11% në PBB-në e vendit. Operatorët vendas janë optimistë në lidhje me sezonin veror dhe shprehen se presin shifra në rritje të turistëve të huaj.
Sjellja e shumë turistëve të cilët tradicionalisht janë tërhequr nga destinacione, si Egjipti, Turqia dhe Tunizia ka ndryshuar dhe po orientohet në favor të Spanjës.
Situata në Greqi është shumë më e ndryshme, në vend të turmave të turistëve që e kanë konsideruar si në parajsë të vërtetë mund të shihni refugjatë.
Flukset masive të emigrantëve që nisen nga vendet në konflikt në Lindjen e Mesme kanë ndikuar sjelljen e turistëve.
Prenotimet e një viti më parë në ishujt si :
Lesbos, Kios, Samos dhe Kos kanë shënuar rënie me 80 – 90% karhasuar me të nëjjtën periudhë të një viti më parë. Sipas të dhënave të një prej agjencive më të mëdha turistike, Ruefa, situata në pjesën tjetër të vendit është krejt e ndryshme.
Të dhënat tregojnë se numri i fluturimeve drejt Kretës dhe Rodhosit u rritën ndjeshëm. Në Mikonos, Zakinthos dhe Korfuz prenotimet u rritën me rreth 20 – 30%.
Italia është një tjetër destinacion që do të gëzojë popullaritet mes shumë destinacione të tjera të Europës.
Në 20 vitet e fundit numri i turistëve është rritur mesatarisht me 3.5%, veçanërisht në qytet e artit.
Profesionistët e turizmit theksojnë se situata të tilla ndikojnë ndjeshëm në kërkesën e turizmit. Në Itali, turizmi kontribuon me rreth 12% të PBB-së. /Monitor/
