Arkitekti italian Paolo Di Nardo ka mbërritur pak minuta më parë në Rinas ndërsa është i pranishëm në konferencën e shoqërisë civile për projektin e stadiumit të ri, Arena Kombëtare. Di Nardo ka ardhur me mision të posaçëm në Tiranë për të kundërshtuar projektin e qeverisë për stadiumin e ri.
Në Tirana International Hotel ka nisur edhe konferenca e shoqërisë civile për stadiumin “Qemal Stafa”. Të pranishëm përveç arkitektit italian janë edhe gazetarë, arkitekt e përfaqësues të shoqërisë civile.
Profesor Di Nardo, njohës shumë i mirë i arkitekturës dhe urbanistikës, si dhe lektor në disa universitete italiane dhe amerikane do të mbajë një diskutim të hapur me të gjitha palët e interesuara për projektin e stadiumit të ri.
Arkitekti italian ka shprehur publikisht qëndrimin e tij kritik ndaj projektit për stadiumin e ri kombëtar duke e konsideruar një humbje të madhe për trashëgiminë historike dhe kulturore të qytetit.
“Takimi është menduar si një diskutim i hapur dhe me natyrë informuese ku pas një diskutimi të shkurtër nga Prof. Di Nardo, janë të mirëpritur pyetje dhe komente nga pjesëmarrësit” thuhet në njoftimin e organizatorëve.
Takimi mbahet pikërisht në vendin ku pak ditë më parë pati një përplasje mes gazetarëve dhe kryeministrit Edi Rama. Kjo, pasi gazetarët nuk u lejuan të hynin në takimin e KKT-së.
