Roma ka arritur të marrë një tjetër fitore duke u ngjitur kështu në vend të dytë me një ndeshje më shumë se Napoli. Ishin kryeqytetasit që kaluan të parët në avantazh me anë të Salah. Vendasit barazojnë pak minuta më vonë. Për golin tjetër duhet të prisnim gati një orë, dhe është Genoa që kalon për herë të parë në avantazh. Roma nuk ja lejon vetes një humbje, duke përmbysur rezultatin në minutat e mbetura me anë të Totti-t dhe El Shaarawy.
Pjesa I Pritet një ndeshje emocionuese në “Luigi Ferraris”. Goli i parë për Roma-n që në minutën e 6-të. Perroti pason për Salah brenda në zonë dhe egjiptiani kalon ekipin e tij në avantazh duke shënuar një gol të bukur. Genoa nuk dekurajohet nga goli dhe vazhdon të luajë lojën e vet me pasime të shpejta përpara të cialt shpërblehe. Laxalt jep një pasim të bukur për Tachtsidis, i cili me qetësi të madhe e çon topi në rrjetë duke barazuar rezultatin në minutën e 13-të. Një ndeshje shumë e bukur për asnjanësit, e cila përfundon me rezultatin 1:1 në pjesën e parë.
Pjesa II Ekipet vijojnë aty ku e lanë në 45 minutat e para. Ndeshja mbetet e bukur për t’u parë nga spektatorët. Është Genoa që kalon në avantazh për herë të parë në minutën e 65-të. Pas një pasimi të Rincon, Pavoletti ndodhet shumë pranë portës dhe nuk mund të gabojë. Roma nuk mund t’ia lejojë vetes një humbje dhe kundërpërgjigjet menjëherë. Është përsëri ai, Francesco Totti. Pas një pasimi të De Rossi-t, kapiteni legjendar godet duke shënuar golin e barazimit. Roma nuk kënaqet me aq dhe pak më vonë gjen edhe golin e avantazhit. Dzeko jep një pasim të bukur për El Shaarawy-n, i cili vetëm me portierin nuk mund të gabojë dhe shënon me qetësi në minutën e 87-të. Roma arrin të menaxhojë lojën në minutat e fundit duke marrë kështu një fitore të merituar.
