Ofrojmë foton e Frrokut pa logo
Një foto ekskluzive e siguruar nga Boldnews.al për të shumëkërkuarin Arben Frroku, është vjedhur në mënyrë flagrante, jo etike dhe jo profesionale nga e përditshmja Panorama dhe Shqiptarja.com. Ky veprim tregon edhe një herë pse qeverisemi kaq keq, sepse rojtarët e interesit publik janë të përfshirë dhe zhgrryhen në baltën ose kënetën siç e quan kryeministri Rama.
Që këtë mund ta bëj Bolino dhe qënëria që punon me të është afërmendsh dhe e ditur pasi interesi i botuesit italian me emër shqiptar në media është fitimi i tenderave dhe ftohja e allateve të kryeministrit Rama.
Me këta palaço mediatik, njerëz pa integritet dhe lamashë të gazetarisë shqiptarë edhe këto dy rreshta janë tepër.
Keqardhje për Gazetën Panorama e cila në falsifikim e sipër i ka ndryshuar edhe foton Arben Frrokut nga përdorimi i tepërt dhe pa kriter i fotoshopit. Ky nuk është rasti i vetëm ku e ashtuquajtura gazeta më e madhe në vend vjedh.
Ka plot raste të tjera ku Panorama mer lajme ekskluzive dhe i citon si lajme të saj. Sigurisht që fresklliku ndaj pushtetit është specialitet edhe i kësaj medie dhe botuesve të saj.
Në një shtet ku nuk funksionon ligji e drejta e autorit dhe ku nuk vlerësohet puna por furçat me tela dhe llarët që u meret goja sa herë që shajnë qeverinë, ky duket një problem i parëndësishëm.
Megjithatë ne i shkruam këto pes rreshta për të ndërgjegjësuar së paku kolegët tanë të mediave se pa punuar dhe duke vjedhur punën dhe djersën e të tjerëve nuk mund ti kërkoni llogari asnjë qeveritari dhe pushtetari kur silleni njësoj si ata.
Boldnews.al
