Këshilli i Evropës ka parashikuar se tre parti politike do bojkotojnë zgjedhjet e parakohshme parlamentare në Maqedoni, të parashikuara më 5 qershor.
Këto zgjedhje priten të dështojnë, nëse në to do të marr pjesë vetëm partia VMRO-DPMNE-ja e Nikolla Gruevskit.
Stefan Schennach, kryesuesi i delegacionit të Asamblesë Parlamentare të KiE-së bën me dije se tri nga 4 partitë kryesore në Maqedoni e kanë informuar Këshillin e Europës se nuk do të marrin pjesë në zgjedhjet e parakohshme të 5 qershorit, nëse nuk përmbushen kushtet për zgjedhje demokratike.
Pas vendimit të opozitës maqedonase dhe të partive shqiptare jashtëparlamentare, edhe Bashkimi Demokratik për Integrim që drejtohet nga Ali Ahmeti, partnere e VMRO-së, po shqyrton seriozisht mos pjesëmarrjen në zgjedhje.
Duke komentuar zhvillimet e fundit në Maqedoni, përfaqësuesit e Asamblesë Parlamentare të Këshillit të Europës kanë kërkuar nga Presidenti maqedonas, George Ivanov, që ta tërheqë sa më parë vendimin për falje. Ata porositën pushtetin që të mos ushtrojë presion ndaj Prokurorisë Speciale dhe kërkuan që të mos pengohen protestat e shoqërisë civile.
