Mijëra besimtarë ortodoksë të qytetit të Korçës, pasditen e sotme kanë kremtuar të “Premten e zezë”, ditë kjo që simbolizon përkujtimin e vuajtjeve të Jezu Krishtit dhe vdekjen e tij në Kryq.
Qytetarë korçarë edhe këtë vit kanë përshkuar në heshtje përgjatë bulevardit “Shën Gjergji”, për të vijuar me pas në bulevardin “Gjergj Kastrioti” për të ndalur edhe një herë tjetër tek sheshi i Katedrales.
Procesioni i kësaj dite është udhëhequr nga Mitropoliti i Korçës, Voskopojës dhe gjithë juglindjes Imzot Johani dhe klerikë të tjerë.
E premtja para Pashkës, e cila njihet si e Premtja e Zezë, shënon ditën e kryqëzimit të Krishtit dhe vuajtjeve të tij me kryqin mbi shpinë, duke ecur drejt vendit ku u kryqëzua, për t’u ringjallur të dielën e Pashkës./Gazeta Express
