Policia e Kosovës ka ndërmarrë një operacion masiv për goditjen e një grupi kriminal, ku të dyshuar janë 40 persona, anëtarë të grupit, mes tyre deputeti i partisë në pushtet dhe ish-komandanti i UÇK Azem Syla, i cili dyshohet se e drejtonte. Ata akuzohen se kanë përvetësuar sasi të mëdha toke publike.
Deri tani janë arrestuar 6 persona si pjesë e një hetimi mbi një skemë të dyshuar përvetësimi tokash me një kosto prej 30 milionë eurosh, njoftoi zyra e prokurorisë të mërkurën.
Azem Syla, një deputet i rëndësishëm i partisë në pushtet, dyshohet se është udhëheqësi i mashtrimit që përfshin rreth 40 vetë, tha misioni policor i BE-së në Kosovë.
Pasi policia bastisi shtëpinë e Sylës, ai nuk u gjet. Ai gjithsesi iu përgjigj një telefonate nga policia, të cilës i tha se gjendej në Shqipëri. Policia i tha se duhej të shkonte për t’u marrë në pyetje në Prishtinë.
Më shumë se 300 policë kryen kontrolle në 42 vende dhe arrestuan së paku gjashtë të dyshuar në operacion.
Prokuroria thotë se po heton për përvetësim pronash publike, krim të organizuar, pastrim parash, falsifikim dokumentesh, korrupsion dhe mashtrim. Grupi dyshohet se ka gjithashtu lidhje me kriminelë serbë.
“Anëtarët e këtij grupi rrëmbyen prona publike të Kosovës me vlerë 30 milionë euro,” thotë deklarata e policisë, shkruan Reporter.al.
Deklarata thoshte se si pasojë e këtyre aktiviteteve kriminale, familjet serbe të Kosovës kishin humbur pronat e veta.
Shumë nga personat e shpallur në kërkim janë ish-zyrtarë, përfshirë Nuhi Kuka, ish-kryetar i Gjykatës Penale të Prishtinës dhe Safedin Haxhiu, ish drejtor i hipotekës së Prishtinës.
Kryebashkiaku i Prishtinës Shpend Ahmeti tha se arrestimet janë të vonuara. “Nga ndërtimet ilegale te keqpërdorimi i pronës publike… faktet janë të shumta. Ne kemi bërë kallëzime penale dhe kërkojmë hetime urgjente,” tha ai.
Megjithëse prokuroria deklaroi se kishte kërkuar për Sylën si i dyshuar për kryetar të grupit, fakti është që ai nuk dukej se po fshihej së paku deri në fillim të kësaj jave.
Të hënën, Kadri Veseli, kryetar i partisë PDK në pushtet dhe kryetar i Kuvendit të Kosovës, pati postuar një foto në Facebook ku ai shfaqet bashkë me Sylën në inaugurimin e një shkolle, krahas kryeministrit Isa Mustafa dhe Ministrit të Arsimit Arsim Bajrami.
Qeveria nuk ka shpjeguar nëse e dinte apo jo faktin se për Sylën qe lëshuar një urdhërarresti në atë kohë.
Presidenti i sapozgjedhur i Kosovës Hashim Thaçi, ish-kryetar i PDK-së dhe, si Syla e Veseli, ish komandand i UÇK, tha se e miratonte operacionin e policisë.
“Unë e mbështes aksionin e institucioneve kombëtare dhe ndërkombëtare të zbatimit të ligjit,” tha ai, duke shtuar se lufta kundër krimit të organizar qe kyçe në ndërtimin e një shteti të drejtë dhe demokratik, kyçe për të ardhmen europiane të Kosovës.
Në shkurt, autoritetet e Kosovës publikuan një listë me prona publike të uzurpuara dhe emrat e rreth 170 emrave të personave të dyshuar si uzurpues. Gjithsesi, një hetim i BIRN zbuloi se uzurpuesit e njohur si të lidhur me PDK-në nuk qenë përfshirë në këtë listë.
