Një ditë pasi prokuroria i konfiskoi, Kastriot Ismailajt, llogaritë bankare me vlerë 3.2 milionë dollarë dhe 450 mijë euro, sot u zhvilluar seanca e tij gjyqësore në Gjykatën e Krimeve të Rënda.
Mirëpo, Ismailaj ka kërkuar që të shtyhet seanca pasi avokati i tij, Vladimir Meçe nuk ishte prezentë. Një kërkesë e tij është hedhur poshtë nga trupi gjykues dhe kanë vazhduar seancën duke i kërkuar Ismailjat që t’i bëjë prezente vetë konkluzionet përfundimtare.
Por i pandehuri Kastriot Ismailaj nuk ka pranuar, duke iu drejtuar trupit gjykues me fjalët: “Është e pamoralshme dhe antikushtetuese që të vijojë seanca duke u mbështetur në nenet që ju thoni, pasi unë nuk kam dijeni për nenet që lexuat, ndaj nuk do të flas as edhe një fjalë pa praninë e avokatit. Të gjitha dokumentet ku janë të parashtruara të gjitha faktet dhe provat i disponon avokati. Ndaj do ju lutesha që të mos nxitoheni, pasi paratë ju i keni të bllokuara”.
Biznesmeni Kastriot Ismailaj ka qenë shumë i irrituar me vendimin e trupit gjykues dhe është shprehur se ai nuk flet pa u këshilluar avokatin e tij. Ismailaj ka deklaruar gjithashtu, se për të bërë mbrojtjen ai është konsultuar edhe me ekspertë të huaj.
Biznesmeni Kastriot Ismailaj po përballet me drejtësinë për aferën “CEZ-¬DIA” . Ismailaj akuzohet se përmes një skeme mashtrimi përvetësoi shumën prej 5 milionë eurosh nga CEZ.
