Shqipëria është konsideruar vendi më i rrezikuar i Europës në aspektin e fatkeqësive natyrore nga studimi i World Risk Report, organizatë që bashkëpunon me Universitetin e OKB-së dhe Institutin për Sigurinë dhe Mjedisin.
Në raportin e fundit, i cili i referohet vitit të shkuar, vendi ynë rradhitet në vendin e 37-të në listën e shteteve më të rrezikshme të botës, duke humbur dy vende nga indeksi i sigurisë së vitit 2011.
Shqipëria mban kofiçentin 10.03, i cili është edhe më i larti në Europë, ndërkohë që rrezikshmëria matet nga shpeshtësia e fatkeqësive natyrore dhe mundësia që ka shteti për t’i përballuar këto të fundit.
Raporti i ka konsideruar më të sigurta shtetet fqinje, teksa Greqia mban vendin 71. Vetëm gjashtë pozicione më poshtë qëndron Serbia në vendin e 77-të.
Nga ana tjetër, Bosnja qëndron në vendin e 93-të, ndërkohë që Maqedonia qëndron e 95-ta.
World Risk Raport ka vlerësuar Vanuatun si shtetin më të rrezikshëm të botës që ndiqet nga Tongo e më pas nga Filipinet.
Ndërkohë, vendet më të sigurta sipas këtij studimi janë Katari, Malta dhe Arabia Saudite.
