Janë publikuar për herë të parë në Francë pamjet tronditëse të një prej kamikazëve që hodhi veten në erë më 13 nëntor në një restorant të Parisit.
Pamjet e vdekjes së Brahim Abdeslam, 31-vjeç, vëllait të Salah Abdeslam ishin kapur nga kamerat e sigurisë në restorantin “Comptoir Voltaire”.
Ishte kjo nata kur një celulë e ISIS-it kreu masakrën në kryeqytetin francez, duke lënë të vdekur 130 persona në disa vende nëpër qytet.
Abdeslam, me pasaportë franceze, shihet teksa hyn në restorant në orën 21:40 të premten e 13 nëntorit. Me fytyrë të nxirë dhe nervoz, ai shëtit para derës së restorantit pasi zbret nga një makinë.
Terroristi ecën drejt një tavoline të zbrazët, para se ta ulë kokën, ta mbulon fytyrën me dorën e tij të majtë dhe ta shpërthejë jelekun vetëvrasës.
Në pamjet, që janë të tmerrshme për publikun, mund të shihet se si trupi i Abdeslamit ndahet në dysh. Ai vdes menjëherë dhe për fat të mirë, të gjithë klientët tjerë të restorantit kanë shpëtuar me lëndime të vogla.
Ishte kanali televiziv M6 në Francë që vendosi të transmetonte këto pamje të shtunën mbrëma, në emisionin “Zone Interdite” (Zonë e Ndaluar).
