Rektorati i Universitetit të Tiranës ka reaguar pas deklaratës së deputetit demokrat Oerd Bylykbashi mbi denoncimin e kërcënimeve nga Emiljano Shullazi. Rektorati thotë se takimet e rektorit Kule dhe kandidatit për rektor Mynyr Koni me ministrin Tahhiri, ministren Nikolla dhe drejtuesit e policisë kanë qenë zyrtare. Sipas rektoratit, përfaqësuesit e institucioneve kanë marrë përsipër përgjegjësinë e tyre.
“Sqarim lidhur me lajmin e shpërndarë në disa media mbi takimin e zhvilluar me Ministrin e Brendshëm, Ministren e Arsimit dhe drejtuesit e Policisë së Shtetit me rektorin e Universitetit të Tiranës dhe dekanin e Fakultetit të Shkencave të Natyrës, kandidatin për rektor Mynyr Koni:
Në takimin zyrtar që rektori i UT-së dhe kandidati për rektor ka zhvilluar me Ministrin e brendshëm, Ministren e Arsimit dhe drejtuesit e lartë të Policisë së Shtetit, ju informojmë se ky takim ka qenë zyrtar dhe rruga e zgjedhur për t’u përballur me problematikën e shfaqur gjatë procesit zgjedhor në UT ka qenë vetëm ajo zyrtare.
Institucionet e përfaqësuara në këtë takim kanë marrë përsipër përgjegjësitë e tyre institucionale”, thuhet në reagimin e Rektoratit të UT.
