Pas përkeqësimit të krizës politike, Maqedoninë e pret edhe një tjetër krizë, ajo financiare, ndërkaq këshilltarët për investime dhe ekspertët e ekonomisë, alarmojnë se vendit i kërcënohet një izolim financiar, pasi që pa zgjedhje të besueshme, nuk mund të ketë mbështetje financiare nga kreditorët e jashtëm.
Humbja e rekomandimit për bisedime për anëtarësim në BE, apo edhe sanksionet kundër politikanëve në qeveri, do ta futin Maqedoninë në krizë dhe inflacion të lartë, ndërkaq dëmet do të jenë të pallogaritura nga pjesa e dytë e vitit, transmeton Telegrafi Maqedoni.
Ish-guvernatori Petar Goshev thotë se tërheqja e rekomandimit nga BE-ja do të bllokojë fondet e BE-së, me të cilat vendi përgatitet për në BE, ndërkaq nuk bëhet fjalë për pak fonde. Kjo do të ndikojë në ndërprerjen e çdo lloj donacioni, ndërkaq do të rritet çmimi i kapitalit dhe borxhet, ku dëmet do të jenë të mëdhaja për Maqedoninë.
